ଦାରିଙ୍ଗବାଡ଼ି,ଏନ୍ଏନ୍ଏସ୍: ଦାରିଙ୍ଗବାଡ଼ି ଡ.ଆମ୍ବେଦକର କନିଷ୍ଠ ମହାବିଦ୍ୟାଳୟ ନିକଟରେ ଆଜି ଅପରାହ୍ଣରେ ଏକ ବାଇକ ଦୁର୍ଘଟଣା ଘଟି ୩ଜଣ ଆହତ ହୋଇଛନ୍ତି। ଆହତମାନେ ହେଲେ ଗଞ୍ଜାମ ଜିଲ୍ଲା ସୋରଡ଼ା ଅଞ୍ଚଳର ବୁଲୁ ନାୟକ, ପତ୍ନୀ ପିଙ୍କି ନାୟକ ଏବଂ ତାଙ୍କର ୪ବର୍ଷର ଶିଶୁ ପୁତ୍ର ବିକାଶ ନାୟକ। ସୂଚନା ଅନୁସାରେ, ବୁଲୁ ନାୟକ ଆଜି ସ୍ତ୍ରୀ ଏବଂ ପୁଅଙ୍କୁ ଧରି ଦାରିଙ୍ଗବାଡ଼ି ଡୁଲୁରିପପାଇନ ଜଙ୍ଗଲକୁ ବଣଭୋଜି କରିବାକୁ ଆସିଥିଲେ। ତେବେ ବଣଭୋଜି କରି ଫେରିବା ସମୟରେ କଲେଜ ଓ ଆଦର୍ଶ ବିଦ୍ୟାଳୟ ମଧ୍ୟରେ ଥିବା ସଂକୀର୍ଣ୍ଣ ପୋଲ ରାସ୍ତାରେ ବାଇକଟି ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା। ସ୍ଥାନୀୟଲୋକେ ଆହତମାନଙ୍କୁ ଦାରିଙ୍ଗବାଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ।
