ନବରଙ୍ଗପୁର,ଏନ୍ଏନ୍ଏସ୍: ନବରଙ୍ଗପୁର ଜିଲ୍ଲା ରାଇଘର ବନ ବିଭାଗ ଦ୍ୱାରା ବଜ୍ରକାପ୍ତା ଉଦ୍ଧାର କରାଯାଇଛି । ବଜ୍ରକାପ୍ତା ଚୋରା ଚାଲାଣ ହେଉଥିବା ଖବର ପାଇ ଜିଲ୍ଲା ବନଖଣ୍ଡ ଅଧିକାରୀ ପ୍ରସନ୍ନ କୁମାର ବେହେରାଙ୍କ ନିର୍ଦ୍ଦେଶରେ ରାଇଘର ବାନାଞ୍ଚଳ ଅଧିକାରୀ ତନୁଜା କାର୍ତ୍ତିକଙ୍କ ନେତୃତ୍ୱରେ ଏକ ଟିମ୍ ବଜ୍ରକାପ୍ତାକୁ ଉଦ୍ଧାର କରିବା ସହ ଜଣକୁ ଗିରଫ କରିଛନ୍ତି । ଗିରଫ ଅଭିଯୁକ୍ତ ଜଣକ ହେଲେ କୋରାପୁଟ ଜିଲ୍ଲା ଦଶମନ୍ତପୁଟ ବ୍ଲକ୍ ଅନ୍ତର୍ଗତ ଡୁମାଗୁଡ଼ା ଗ୍ରାମର ସଂଜିତ କୁଲେସିକା ।
ମିଳିଥିବା ରିପୋର୍ଟ ମୁତାବକ, ହାଟ ଭରଣ୍ଡି ନିକଟରେ ୨ଜଣ ବ୍ୟକ୍ତି ବାଇକ ଯୋଗେ ଏକ ବ୍ୟାଗରେ କିଛି ନେଉଥିବା ସନ୍ଦେହ କରି ତାକୁ ପଚାରିବା ସମୟରେ ବଜ୍ରକାପ୍ତା ଦେଖିବାକୁ ପାଇଥିଲେ । ବାଇକକୁ ଅଟକାଇଥିଲେ ମଧ୍ୟ ଘଟଣାସ୍ଥଳରୁ ଜଣେ ଚମ୍ପଟ ମାରିଥିବାବେଳେ ଅନ୍ୟଜଣେ ବ୍ୟକ୍ତିକୁ ଧରିବାରେ ବନ ବିଭାଗ କର୍ମଚାରୀ ସଫଳ ହୋଇଥିଲେ । ଉକ୍ତ ବ୍ୟକ୍ତିକୁ ବଜ୍ରକାପ୍ତା ଚାଲାଣ ଅଭିଯୋଗରେ ରାଇଘର ରେଞ୍ଜ କାର୍ଯ୍ୟାଳୟକୁ ଅଣାଯାଇଥିଲା । ତଦନ୍ତ ପରେ ଆଜି ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ରାଇଘର ରେଞ୍ଜର ତନୁଜା କାର୍ତ୍ତିକ କହିଛନ୍ତି । ଏହା ଏକ ମାଈ ବଜ୍ରକାପ୍ତା ଓ ଏହାର ଓଜନ ୮.୨ କିଲୋ ଗ୍ରାମ ରହିଛି । ବଜ୍ରକାପ୍ତାକୁ ଚିକିତ୍ସା କରାଯାଉଛି ବୋଲି ରେଞ୍ଜର ତନୁଜା କାର୍ତ୍ତିକ କହିଛନ୍ତି ।
