ବାଲିଗୁଡ଼ା,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅଞ୍ଚଳରେ ଦମକଳ ଗାଡ଼ି ଧକ୍କାରେ ଅଟୋ ଓଲଟି ଚାଳକ ଗୁରୁତର ଭାବେ ଆହତ ହୋଇଥିବା ଜଣାପଡ଼ିଛି । ଗୁରୁତର ଜଣକ ହେଲେ ଆକବର ଦିଗାଳ । କ.ନୂଆଗାଁ ଦମକଳ ଗାଡ଼ିରେ ଥିବା ଅଗ୍ନିଶମ କର୍ମଚାରୀ ଅକବରଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବାଲିଗୁଡ଼ା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଛନ୍ତି । ମିଳିଥିବା ରିପୋର୍ଟ ମୁତାବକ, ଧୁଙ୍ଗିଆଦେଇ ମନ୍ଦିର ନିକଟରେ ୫୯ନଂ ଜାତୀୟ ରାଜପଥ ଉପରେ ଏକ ଗଛ ପଡ଼ି ରାସ୍ତା ଅବରୋଧ ହୋଇଥିବା ଖବର ପାଇ ବାଲିଗୁଡ଼ା ଦମକଳ ବାହିନୀ ଗାଡ଼ି ନେଇ ଯାଉଥିବାବେଳେ ବାଲିଗୁଡ଼ାରୁ ଗୁମାପଦର ଅଭିମୁଖେ ଯାଉଥିବା ଏକ ଅଟୋକୁ ଦଣ୍ଡପଦର ନିକଟସ୍ଥ ପେଟ୍ରୋଲ ପମ୍ପ୍ ନିକଟରେ ଧକ୍କା ଦେଇଥିଲା । ଫଳରେ ଅଟୋଟି ରାସ୍ତା କଡ଼ରେ ଓଲଟି ପଡ଼ିଥିଲା । ଖବର ପାଇ ଘଟଣାସ୍ଥଳରେ ବାଲିଗୁଡ଼ା ପୁଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିବା ଜଣାପଡ଼ିଛି ।
