ନୂଆଦିଲ୍ଲୀ,ଏଜେନ୍ସି: କରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିବା କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ନମୁନା ପରୀକ୍ଷା ନେଗେଟିଭ୍ ଆସିଛି ବୋଲି ରବିବାର ତାଙ୍କ ଦଳୀୟ ସହକର୍ମୀ ମନୋଜ ତିୱାରି ଟୁଇଟରରେ ପୋଷ୍ଟ କରିବା ପରେ ପୁଣି ଡିଲିଟ୍ କରିଦେଇଛନ୍ତି। ହେଲେ ଉକ୍ତ ପୋଷ୍ଟ ଡିଲିଟ୍ ହେବା ପୂର୍ବରୁ ଏ ଖବର ଚାରିଆଡେ ବ୍ୟାପୀ ଯାଇଥିଲା। ଏଥିରେ ବିଭିନ୍ନ ମହଲରେ ବିସ୍ମୟ ପ୍ରକାଶ ପାଇଛି। ଏ ବିଷୟରେ ସ୍ପଷ୍ଟୀକରଣ ଦେଇ ଗୃହମନ୍ତ୍ରଣାଳୟ ଜଣେ ଅଧିକାରୀ କହିଛନ୍ତି ଯେ, ପଜିଟିଭ୍ ଜଣାପଡିବା ପରଠାରୁ ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହଙ୍କର ଆଉ କରୋନା ପରୀକ୍ଷା କରାଯାଇନାହିଁ। ଅମିତ ଶାହଙ୍କର ସ୍ୱାସ୍ଥ୍ୟାବସ୍ଥା ସଂକ୍ରାନ୍ତରେ ମନୋଜ ତିୱାରି କିଛି ସୂଚନା ଦେଇନଥିଲେ ମଧ୍ୟ ଆଗାମୀ ଦୁଇ ଦିନ ମଧ୍ୟରେ ନମୁନା ପରୀକ୍ଷା କରାଯିବ ବୋଲି ବିଶେଷସୂତ୍ରରୁ ଜଣାପଡିଛି।
