ନୂଆଦିଲ୍ଲୀ: ୱେଷ୍ଟେଣ୍ଡିଜ ଟୁର୍ଣ୍ଣାମେଣ୍ଟ ସରିବା ପରେ ଭାରତୀୟ କ୍ରିକେଟ ଟିମ୍ ଆୟରଲାଣ୍ଡ ପହଞ୍ଚିଛି । ଭାରତୀୟ ଟିମ୍ ଅଗଷ୍ଟ ୧୮ରେ ଆୟରଲାଣ୍ଡ ବିରୋଧରେ ୩ ମ୍ୟାଚର ଟି-୨୦ ସିରିଜ ଖେଳିବ । ଏହି ସିରିଜ ଆରମ୍ଭ ହେବା ପୂର୍ବରୁ କ୍ରିକେଟ ଆୟରଲାଣ୍ଡ ମାଲାମାଲ ହୋଇଯାଇଛି । ପ୍ରଥମ ୨ଟି ମ୍ୟାଚ ପାଇଁ କିଛି ମିନିଟରେ ହିଁ ଟିକେଟ ବିକ୍ରି ହୋଇଯାଇଛି । ଏନେଇ ଆୟରଲାଣ୍ଡ ନିଜ ୱେବସାଇଟରେ ବୟାନ ଜାରୀ କରି ସୂଚନା ପ୍ରଦାନ କରିଛି ।
ଭାରତ ଓ ଆୟରଲାଣ୍ଡ ମଧ୍ୟରେ ହେବାକୁ ଥିବା ଏହି ସିରିଜର ସମସ୍ତ ମୁକାବିଲା ଡବଲିନ ‘ଦି ଭିଲେଜ ମାଲାହାଇଡ କ୍ରିକେଟ କ୍ଲବ’ ପଡ଼ିଆରେ ଖେଳାଯିବ । ଏହି ଷ୍ଟାଡିୟମର ଦର୍ଶକ କ୍ଷମତା ୧୧ହଜାର ୫୦୦ ରହିଛି । ଉଭୟ ଟିମ୍ ପରସ୍ପର ସହ ବର୍ତ୍ତମାନ ସୁଦ୍ଧା ମାତ୍ର ୫ଟି ମ୍ୟାଚ୍ ଖେଳିଛି । ଏହି ସମସ୍ତ ମୁକାବିଲା ଭାରତୀୟ ଟିମ୍ ନିଜ ନାଁରେ କରିଛି ।
