ଭୁବନେଶ୍ୱର,ଏନ୍ଏନ୍ଏସ୍ : ଅଭିନୟ, ରଣବୀର କପୁରଙ୍କ ସହିତ ପ୍ରେମ ଓ ରୋମାନ୍ସକୁ ନେଇ ସର୍ବଦା ଚର୍ଚ୍ଚାରେ ଥାଆନ୍ତି ବଲିଉଡ୍ ବିୟୁଟି ଆଲିଆ ଭଟ୍ଟ। ଏ ଦୁଇଟିକୁ ଛାଡ଼ିଦେଲେ ଆଉ ଗୋଟିଏ ବିଷୟକୁ ନେଇ ସେ ଚର୍ଚ୍ଚା ସାଉଁଟିଥାନ୍ତି। ତାହା ହେଉଛି ବିଭିନ୍ନ ସାକ୍ଷାତକାର, ଟକ-ସୋ’, ରିୟଲିଟି ସୋ’ ଆଦିରେ ତାଙ୍କୁ ପଚରା ଯାଇଥିବା ପ୍ରଶ୍ନ ଓ ଆଲିଆ ଦେଉଥିବା ମଜାଦାର ଉତ୍ତର। ନିକଟରେ ଘଟିଛି ସେମିତି ଏକ ଘଟଣା। ଏ ସମ୍ବନ୍ଧିତ ଏକ ଭିଡିଓ ମଧ୍ୟ ଖୁବ୍ ଭାଇରାଲ ହେଉଛି ସୋସିଆଲ ମିଡିଆରେ। ଏହି ଭିଡିଓଟି ଏକ ପୁରସ୍କାର ଉତ୍ସବର। ଏଥିରେ ସୋ’ର ହୋଷ୍ଟ ଅପାରଶକ୍ତି ଖୁରାନ୍ନା ଆଲିଆଙ୍କୁ ପ୍ରଶ୍ନ କରୁଛନ୍ତି, ‘ବିନା ମେକଅପରେ ଆପଣ କେଉଁ ସେଲିବ୍ରିଟିଙ୍କୁ ବିଗ ବସ ହାଉସ୍କୁ ପଠାଇବାକୁ ଚାହାନ୍ତି?’ ଉତ୍ତରରେ ଆଲିଆ କହୁଛନ୍ତି, ‘ଆପଣଙ୍କୁ’। ଅର୍ଥାତ ଅପାରଶକ୍ତିଙ୍କୁ। ଅପାରଶକ୍ତି ସହିତ ଆଲିଆ ଆୟୁଷ୍ମାନ ଖୁରାନାଙ୍କ ନାଁ ବି କହନ୍ତି। ଆଲିଆଙ୍କ ଜବାବ ଶୁଣି ଆୟୁଷ୍ମାନ କହିଛନ୍ତି, ‘ଆମେ ମେକଅପ ଲଗାଉନାହୁଁ।’ ଆଲିଆଙ୍କ ଏହି ପୁରୁଣା ଭିଡିଓକୁ ତାଙ୍କର ପ୍ରଶଂସକ ନିଜ ନିଜ ଇନଷ୍ଟାଗ୍ରାମ ଏକାଉଣ୍ଟରେ ସେୟାର କରିଛନ୍ତି। ଏହି ଭିଡିଓଟିକୁ ଏହା ମଧ୍ୟରେ ଦର୍ଶକ ୨ ଲକ୍ଷରୁ ଅଧିକ ଥର ଦେଖିସାରିଲେଣି। ଆଲିଆଙ୍କ ଅପକମିଂ ଫିଲ୍ମ ମଧ୍ୟରେ ରହିଛି ‘ବ୍ରହ୍ମାସ୍ତ୍ର’, ଯେଉଁଥିରେ ଆଲିଆଙ୍କ ହିରୋ ଅଛନ୍ତି ରଣବୀର କପୁର।
