ଦେବଗଡ଼,ଏନ୍ଏନ୍ଏସ୍ : ଦେବଗଡ଼ ଜିଲ୍ଲା ରିଆମାଳ ଥାନା ଅନ୍ତର୍ଗତ ବୁଡ଼ିଦୋ ଛକ ନିକଟରେ ଏକ ଟ୍ରକ ଶଗଡ଼କୁ ଧକ୍କା ଦେବା ଯୋଗୁ ବଳଦର ମୃତ୍ୟୁ ଘଟିଥିବାବେଳେ ଜଣେ ଚାଷୀ ଆହତ ହୋଇଛନ୍ତି । ମିଳିଥିବା ରିପୋର୍ଟ ମୁତାବକ, ବୁଡ଼ିଦୋ ଗ୍ରାମର ପ୍ରଦୀପ ସାହୁ (୨୮) ନାମକ ଜଣେ ବ୍ୟକ୍ତି ଶଗଡ଼ ଯୋଗେ ନିଜ କିଆରିକୁ ଚାଷ ପାଇଁ ଗୋବର ଧରି ଯାଉଥିବାବେଳେ ଏକ ଅଜଣା ଟ୍ରକ୍ ସାମ୍ନା ପଟୁ ଧକ୍କା ଦେଇ ଫେରାର ମାରିଥିଲା । ପରେ ଘଟଣାସ୍ଥଳରେ ଏକ ବଳଦର ମୃତ୍ୟୁ ଘଟି ଥିବାବେଳେ ପ୍ରଦୀପ ଗୁରୁତର ଭାବେ ଆହତ ହୋଇଥିଲେ । ଖବର ପାଇ ରିଆମାଳ ଅଗ୍ନିଶମ ବାହିନୀ ପହଞ୍ଚି ପ୍ରଦୀପକୁ ଉଦ୍ଧାର କରି ଚିକିତ୍ସା ପାଇଁ ଦେବଗଡ଼ ଜିଲ୍ଲା ମୁଖ୍ୟ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ଘଟଣାସ୍ଥଳକୁ ପୁଲିସ ଓ ପ୍ରାଣୀ ଚିକିତ୍ସା ଅଧିକାରୀ ଶୁଭଶ୍ରୀ ଷଡ଼ଙ୍ଗୀ ଯାଇ ତଦନ୍ତ ଆରମ୍ଭ କରିଛନ୍ତି ।
