ଆଲିସାନ ସିନେମା ହଲରେ ଗଣ୍ଡଗୋଳ ଘଟଣାରେ କଣ୍ଟାବାଞ୍ଜି ବିଧାୟକଙ୍କ ପୁଅଙ୍କ ସମେତ ୬ ଗିରଫ
ପାଟଣାଗଡ଼,ଏନ୍ଏନ୍ଏସ୍: କଣ୍ଟାବାଞ୍ଜି-ବେଲପଡ଼ା ସୀମାରେ ଥିବା ଆଲିିସାନ ସିନେମା ହଲରେ ଗତକାଲି ରାତିରେ ବିଧାୟକ ସନ୍ତୋଷ ସିଂହ ସାଲୁଜାଙ୍କ ପୁଅ ଅମିତ ସିଂ ସାଲୁଜା ଓରଫ ସେଜି ଓ ସିନେମା ହଲର ମାଲିକଙ୍କ ପୁଅ ସହ ଗଣ୍ଡଗୋଳ ହୋଇଥିଲା। ଏପରିକି ସାଲୁଜା ବନ୍ଧୁକ ଦେଖାଇଥିବା ନେଇ ମଧ୍ୟ ଅଭିଯୋଗ ହୋଇଥିବା ଜଣାପଡ଼ିଛି । ଖବର ପାଇ ବେଲପଡ଼ା ପୁଲିସ ଘଟଣାସ୍ଥଳରେ ପହଞ୍ଚି ଗଣ୍ଡଗୋଳକୁ ଆୟତ୍ତ କରିବା ସହ ସେଜିଙ୍କ ସମେତ ୬ଜଣଙ୍କୁ ବିଳମ୍ବିତ ରାତିରେ ବେଲପଡ଼ା ଥାନାକୁ ଆଣି ଏକ ମାମଲା ରୁଜୁ କରିବା ସହ ଆଜି ପାଟଣାଗଡ଼ କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତମାନେ ହେଲେ ସେଜି, ଅଜୟ ଅଗ୍ରୱାଲ, ବିକାଶ ଅଗ୍ରୱାଲ, ବିପୁଳ ମାରୁ, ଧର୍ମବୀର ଗୁପ୍ତା ଓ ରାଜପାତ୍ରଙ୍କ ବିରୁଦ୍ଧରେ ମାମଲା ଦାୟର ହୋଇଛି । ଏହାସହ ଅମିତ ସିଂହ ସାଲୁଜାଙ୍କ ଜିମରୁ ନଗଦ ୧୯ ଲକ୍ଷ ଟଙ୍କା ଓ କିଛି ପରିମାଣର ମଦ ଜବତ କରାଯାଇଥିବା ଜଣାପଡ଼ିଛି । ଘଟଣା ପରେ ବେଲପଡ଼ା ଥାନାରେ ପାଟଣାଗଡ଼ ଏସଡିପିଓଙ୍କ ସମେତ ଜିଲ୍ଲାର ସମସ୍ତ ଥାନାଧିକାରୀ ଉପସ୍ଥିତ ରହିଛନ୍ତି ।
