କଳାହାଣ୍ଡି,ଏନ୍ଏନ୍ଏସ୍: ମହାଲିଙ୍ଗ ସନସାଇନ୍ ପବ୍ଲିକ୍ ସ୍କୁଲ୍ ଅଧ୍ୟକ୍ଷା ନିଖୋଜ ଘଟଣାରେ ପୁଲିସ ହେପାଜତରୁ ଚମ୍ପଟ ମାରିଲେ ସ୍କୁଲ୍ ପରିଚାଳନା କମିଟି ସଭାପତି। ତାଙ୍କ ନାଁ ଗୋବିନ୍ଦ ସାହୁ ହୋଇଥିବା ସୂଚନା ମିଳିଛି। ପୁଲିସର କହିବା ମୁତାବିକ ଗତକାଲି ବିଳମ୍ବିତ ରାତିରେ ଟିଟିଲାଗଡ଼ ଥାନା ପୁଲିସ ବ୍ୟାରେଜ୍ରୁ ଚମ୍ପଟ ମାରିଛନ୍ତି ଗୋବିନ୍ଦ ସାହୁ। ଅଧ୍ୟକ୍ଷା ନିଖୋଜ ହେବା ଘଟଣାରେ ଗୋବିନ୍ଦଙ୍କୁ ଅଟକ ରଖିଥିଲା ପୁଲିସ। ସୂଚନା ଅନୁସାରେ ଗତ ୭ ତାରିଖରୁ ମହାଳିଙ୍ଗ ଘରୋଇ ସ୍କୁଲର ଅଧ୍ୟକ୍ଷା ମମିତା ମେହେର ନିଖୋଜ ଅଛନ୍ତି।
ତାଙ୍କ ପରିବାର ଲୋକେ ସାଙ୍ଗ ସାଥି ଓ ସ୍କୁଲ କର୍ତ୍ତୃପକ୍ଷଙ୍କୁ ଯୋଗାଯୋଗ କଲାପରେ କୌଣସି ସଠିକ ତଥ୍ୟ ନ ପାଇବାରୁ ସିନ୍ଧେକଳା ଥାନାରେ ଏକ ଲିଖିତ ଅଭିଯୋଗ କରିଥିଲେ। ଏହି ଅଭିଯୋଗକୁ ନେଇ ସିନ୍ଧେକଳା ପୁଲିସ ତଦନ୍ତ ଜାରି ରଖିଛି। ଶେଷରେ ଗତ ୧୨ ତାରିଖରେ ବଲାଙ୍ଗିର ଏସଡ଼ିପିଓ ଏବଂ ସିନ୍ଧେକଳା ପୁଲିସ ଗାଁ’କୁ ଆସି ଘରୋଇ ସ୍କୁଲ ମାଲିକ ଗୋବିନ୍ଦ ସାହୁଙ୍କୁ ଉଠାଇ ନେଇଥିଲେ।
