ଦେବଗଡ଼,ଏନ୍ଏନ୍ଏସ୍: ଦେବଗଡ଼ ଥାନା ଅନ୍ତର୍ଗତ ଗୋଇଲ ଗ୍ରାମରେ ଘରେ ଏକୁଟିଆ ଥିବା ସମୟରେ ଜଣେ ମହିଳାଙ୍କୁ ଅସଦାଚରଣ କରିବା ସହ ଦମ୍ପତିଙ୍କୁ ହତ୍ୟା ଧମକ ଦେଇ ଉକ୍ତ ଗ୍ରାମର ୩ ଜଣ ଯୁବକ ଗିରଫ ହୋଇଥିବା ଜଣାପଡିଛି।
ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଗତ ବୁଧବାର ଦିନ ଗୋଇଲ ଗ୍ରାମର ପୁଟ ପଥୁରିଆଙ୍କ ସ୍ତ୍ରୀ ସୀତା ପଥୁରିଆ (୩୨) ଅପରାହ୍ଣ ପ୍ରାୟ ୩ଟା ସମୟରେ ନିଜ ଘରେ ଏକୁଟିଆ ଥିବା ସମୟରେ ଉକ୍ତ ଗ୍ରାମର ଚକ୍ର ପାତ୍ରଙ୍କ ପୁଅ ଉମାକାନ୍ତ ପାତ୍ର(୧୯), ପୂର୍ଣ୍ଣ ପାତ୍ରଙ୍କ ପୁଅ ବିଜୟ ପାତ୍ର (୩୦) ଓ ହରି ପାତ୍ରଙ୍କ ପୁଅ ରାଜ କୁମାର ପାତ୍ର ହାତରେ କୁରାଢ଼ୀ ଓ ଭୁଜାଲି ଧରି ସେଠାରେ ପହଞ୍ଚି ସୀତାଙ୍କୁ ଆଶ୍ରବ୍ୟ ଭାଷାରେ ଗାଳିଗୁଲଜ କରିବା ସହ ଅସଦାଚରଣ କରିଥିଲେ।
ସୀତା ଭୟରେ କବାଟ ବନ୍ଦ କରିଦେବାରୁ ଅଭିଯୁକ୍ତ ମାନେ ଘର କବାଟରେ ଛକି ଚିହ୍ନ ଆଙ୍କି ସୀତା ଓ ତାଙ୍କ ସ୍ୱାମୀଙ୍କୁ ନିଶ୍ଚିତ ହତ୍ୟା କରିବାର ଧମକ ଦେଇ ସ୍ୱାମୀଙ୍କୁ ଅନ୍ୟତ୍ର ଖୋଜିବାକୁ ଚାଲି ଯାଇଥିଲେ। ଏହା ପରେ ଅଭିଯୁକ୍ତମାନେ ଗୋଇଲ ଘଟି ନିକଟରେ ସୀତାଙ୍କ ସ୍ୱାମୀ ପୁଟଙ୍କୁ ପାଇ ମରଣାନ୍ତକ ଆକ୍ରମଣ କରିଥିଲେ। ପୁଟ କୌଶଳ କ୍ରମେ ସେଠାରୁ ଖସି ଆସି ଥିଲେ। ଏନେଇ ସୀତା ଦେବଗଡ଼ ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ବିଭିନ୍ନ ଦଫାରେ ଏକ ମାମଲା ରୁଜୁ କରି ଘଟଣାର ତଦନ୍ତ କରିବା ସହ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି।
