ପାଟଣା,ଏନ୍ଏନ୍ଏସ୍: କେନ୍ଦୁଝର ଜିଲ୍ଲା ପାଟଣା ରେଞ୍ଜ ଉଦୟପୁର ବିଟ୍ ବାଲିପଶି ନିକଟରୁ ଆଜି ଅପରାହ୍ଣରେ ପାଟଣା ବନବିଭାଗ ଶାଳ ଚୌକାଠ ବୋଝେଇ ବୋଲେରୋ ଗାଡିକୁ ଜବତ କରିଛ। ଉକ୍ତ ଗାଡି ଭିତରୁ ୬୨ ଟି ଚୌକାଠ ଜବତ ହୋଇଛି । ଜବତ କାଠର ଆନୁମାନିକ ମୂଲ୍ୟ ୬୦ ହଜାର ରୁ ଉର୍ଦ୍ଧ ହେବ ବୋଲି ପାଟଣା ବନଖଣ୍ଡ ଅଧିକାରୀ ପବିତ୍ର ମୋହନ ନାଏକ କହିଛନ୍ତି। ସୂଚନା ଅନୁସାରେ, କାଠ ବୋଝେଇ ଗାଡିଟି କରଞ୍ଜିଆରୁ ପାଟଣାକୁ ଆସୁଥିବାବେଳେ କରଞ୍ଜିଆ ବନ ବିଭାଗ ଗାଡିକୁ ପିଛା କରି ପାଟଣା ବନ ବିଭାଗକୁ ଖବର ଦେଇଥିଲେ। ଉଭୟ ପଟୁ ଗାଡିକୁ ଧରିବାକୁ ବନ ବିଭାଗ ଚେଷ୍ଟା କରୁଥିବାବେଳେ ଗାଡି ଟି ସାହାରପଡା ବିଲା ରାସ୍ତାଦେଇ ଚଢେଇଭୋଳ ପଟକୁ ପଳାଇଯାଇ ବାଲିପଶି ନିକଟରେ ଗାଡିକୁ ଛାଡି ଡ୍ରାଇଭର ଓ ମାଫିଆ ଫେରାର ହୋଇଯାଇଥିଲେ। ଏହି ଚଢ଼ଉରେ ପାଟଣା ରେଞ୍ଜର ପବିତ୍ର ମୋହନ ନାଏକ, ସାହାରପଡା ଫରେଷ୍ଟର ସୁନିତା ବାଘେଲ, ଫୋରେଷ୍ଟ ଗାର୍ଡ କୁନ୍ତଳା ମହାନ୍ତ, ରୂପଶ୍ରୀ ସାହୁଙ୍କ ସମେତ ପାରା ଷ୍ଟାଫ ସାମିଲ ଥିଲେ।
