ମାଲକାନଗିରି,ଏନ୍ଏନ୍ଏସ୍: ମାଲକାନଗିରି ଜିଲ୍ଲା ମାଥିଲି ଥାନା ଗୋବିନ୍ଦପାଲ୍ଲୀ ଫରେଷ୍ଟ ଚେକଗେଟ୍ ନିକଟରେ ପୁଲିସ ୨୯୫ କେଜି ୯୦୦ ଗ୍ରାମ ଗଞ୍ଜେଇ ଜବତ କରିବା ସହ ଏଥିରେ ସମ୍ପୃକ୍ତ ୬ ଜଣଙ୍କୁ ଗିରଫ କରିଛି। ସୂଚନା ଅନୁସାରେ, ଗତ ୨୭ ତାରିଖ ରାତିରେ ମାଥିଲି ଥାନା ଏସଆଇ ଜେପି ହୋତାଙ୍କ ସହ ଅନ୍ୟ ପୁଲିସ କର୍ମଚାରୀ ଗୋବିନ୍ଦପାଲ୍ଲୀ ଫରେଷ୍ଟ ଚେକଗେଟ ନିକଟରେ ପାଟ୍ରୋଲିଂ କରୁଥିବା ସମୟରେ ଖଇରପୁଟ ରାସ୍ତାଦେଇ ଆସୁଥିବା ଏକ ପିକଅପ୍ ଭ୍ୟାନ ଓ ଏକ କାରକୁ ଅଟକାଇ ଥିଲେ। ପରେ ଉକ୍ତ ଗାଡ଼ିକୁ ଯାଞ୍ଚ କରିଥିଲେ। ଗାଡିରୁ ୧୨ ପ୍ୟାକେଟ ଗଞ୍ଜେଇ ଜବତ କରିବା ସହ ୪ ଜଣକୁ ଗିରଫ କରାଯାଇଥିଲା। ଉକ୍ତ ୧୨ଟି ପ୍ୟାକେଟରେ ୨୯୫ କେଜି ୯୦୦ ଗ୍ରାମ ଗଞ୍ଜେଇ ଥିବା ଜଣାପଡିଛି। ସେମାନଙ୍କୁ ଚରାଉଚରା କରିବାରୁ ଉକ୍ତ ଗଞ୍ଜେଇ ଚିତ୍ରକୋଣ୍ଡା ଥାନା ଡାଇକ୍-୩ ଗ୍ରାମରୁ ଆଣି ନବରଙ୍ଗପୁର ଜିଲ୍ଲାକୁ ଚାଲାଣ କରାଯାଉଥିବା ବେଳେ ସେମାନଙ୍କୁ ଦୁଇଜଣ ଯଥା ଏମ୍ଭି -୫୦ ଗ୍ରାମର ହରିଚାନ୍ଦ ବିଶ୍ୱାସ ଓ ଏମଭି- ୨୭ ଗ୍ରାମର ପରିତୋଷ ମଣ୍ଡଳ ସହଯୋଗ କରୁଥିବା ପ୍ରକାଶ କରିଥିଲେ। ଏହାପରେ ସହଯୋଗ କରୁଥିବା ୨ ଜଣଙ୍କୁ ମଧ୍ୟ ପୁଲିସ ଗିରଫ କରିଛି। ସେମାନଙ୍କ ନିକଟରୁ ୫ ଟିି ମୋବାଇଲ ଓ ଏକହଜାର ଟଙ୍କା ମଧ୍ୟ ଜବତ କରିଛି। ଜବତ ଗଞ୍ଜେଇର ଆନୁମାନିକ ମୂଲ୍ୟ ୨୦ ଲକ୍ଷ ଟଙ୍କାହେବ ବୋଲି ଜଣାପଡ଼ିଛି। ସମସ୍ତଙ୍କୁ ଆଜି କୋର୍ଟ ଚାଲାଣ କରାଯାଇଥିବା ଏସଡିପିଓ ପ୍ରହଲ୍ଲାଦ ସହାଇ ମୀନା ପ୍ରକାଶ କରିଛନ୍ତି।
