ବଲାଙ୍ଗିର,ଏନ୍ଏନ୍ଏସ୍: ବଲାଙ୍ଗିର ସହରରେ ଗୋଟିଏ ପଡ଼ାରୁ ଅନ୍ୟ ପଡ଼ାକୁ ସଂକ୍ରମଣ ବ୍ୟାପିବାରେ ଲାଗିଛି। ଏହି ପରିପ୍ରେକ୍ଷୀରେ ରାଧାରାଣୀପଡ଼ା ଓ ରୁଗୁଡ଼ିପଡ଼ାରେ କରୋନା ଆକ୍ରାନ୍ତ ଚିହ୍ନଟ ହେବାପରେ ଉଭୟ ପଡ଼ାର କିଛି ଅଂଶକୁ ପ୍ରଶାସନ ତରଫରୁ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। ରାଧାରାଣୀ ପଡ଼ାର ସୁଶାନ୍ତ ଦର୍ଜିଙ୍କ ଘରଠାରୁ ମନୀଷ ମିଶ୍ରଙ୍କ ଘର ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ ଓ ବାକି ଅଞ୍ଚଳକୁ ବଫର ଜୋନ ଭାବେ ଘୋଷଣା କରାଯାଇଛି। ସେହିପରି ରୁଗୁଡ଼ିପଡ଼ାର ଗଗନ ମହାନ୍ତିଙ୍କ ଘରଠାରୁ କାଙ୍ଗାଲୁ ପୋଢ଼ ଘର ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। ରୁଗୁଡ଼ିପଡ଼ାର ବାକି ଅଞ୍ଚଳକୁ ବଫର ଜୋନ ଭାବେ ଘୋଷଣା କରାଯାଇଥିବା ଜଣାପଡ଼ିଛି। କଣ୍ଟେନମେଣ୍ଟ ଜୋନର ବାସିନ୍ଦାଙ୍କୁ ଘରୁ ନବାହାରିବା ସହ ସମ୍ପୃକ୍ତ ଅଞ୍ଚଳରେ ସମସ୍ତ ପ୍ରକାର ବ୍ୟବସାୟିକ ପ୍ରତିଷ୍ଠାନ ଓ ଦୋକାନ ବଜାର ବନ୍ଦ ରଖିବାକୁ ନିର୍ଦ୍ଦେଶ ଜାରି କରାଯାଇଛି। ଏତଦବ୍ୟତୀତ ସହରରେ ଥିବା ବିଡିସି ଓ ଏଚଡିଏଫସି ବ୍ୟାଙ୍କକୁ ୩୦ ତାରିଖ ପର୍ଯ୍ୟନ୍ତ ବନ୍ଦ କରାଯାଇଛି। କାରଣ ଏହି ଦୁଇ ବ୍ୟାଙ୍କରୁ ମଧ୍ୟ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି।
