ଭୁବନେଶ୍ୱର,ଏନ୍ଏନ୍ଏସ୍: ରାଜ୍ୟରେ ଗୋଟିଏ ପରେ ଗୋଟିଏ ଜିଲ୍ଲାକୁ କରୋନା ବ୍ୟାପି ଚାଲିଛି। ଗତକାଲି ୨ଟି ନୂଆ ଜିଲ୍ଲାକୁ କରୋନା ଛୁଇଁଥିବା ବେଳେ ଆଜି ଆଉ ୨ଟି ଜିଲ୍ଲାରେ ପହଂଚିଛି। ପ୍ରଥମଥର ପାଇଁ ବରଗଡ଼ ଓ ନୂଆପଡ଼ାରୁ କରୋନା ପଜିଟିଭ ଚିହ୍ନଟ ହୋଇଛନ୍ତି। ଏଥି ସହିତ ରାଜ୍ୟରେ ମୋଟ ୨୮ଟି ଜିଲ୍ଲାରେ କରୋନା କାୟା ବିସ୍ତାର କରିଛି।
ସୂଚନାଯୋଗ୍ୟ ଯେ, ଆଜି ଉଭୟ ନୂଆପଡ଼ା ଓ ବରଗଡ଼ରୁ ଜଣେ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି। ନୂଆପଡ଼ା ଜିଲ୍ଲାର ଆକ୍ରାନ୍ତ ଜଣକ ଖଡ଼ିଆଳ ବ୍ଲକ୍ ଅନ୍ତର୍ଗତ ସାନମହେଶ୍ୱର ଝୋଳପଦର ଗ୍ରାମର ଜଣେ ପ୍ରବାସୀ ଓଡ଼ିଆ ଶ୍ରମିକ ବୋଲି ଜଣାପଡ଼ିଛି। ମୁମ୍ବାଇରୁ ଫେରି ଏହି ଆକ୍ରାନ୍ତ ଜଣକ ଏକ ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ରରେ କ୍ୱାରେଣ୍ଟାଇନରେ ରହିଥିଲେ। ସେହିପରି ବରଗଡ଼ରୁ ଚିହ୍ନଟ ହୋଇଥିବା ଆକ୍ରାନ୍ତ ଜଣକ ସହରର ୧୪ ନମ୍ବର ୱାର୍ଡର ସୁବାଷ ନଗରର ଏବଂ ସେ ବାହାର ରାଜ୍ୟରୁ ଫେରି ହୋମ କ୍ୱାରେଣ୍ଟାଇନରେ ରହିଥିବା ଜଣାପଡ଼ିଛି।
