ଖୋର୍ଦ୍ଧା,ଏନ୍ଏନ୍ଏସ୍: ଆଦର୍ଶ ଥାନା ଅନ୍ତର୍ଗତ ଅର୍ଜୁନପୁର କାଜୁ ଜଙ୍ଗଲରେ ଆଜି ସକାଳେ ବୋମାମାଡ଼ ହୋଇଥିବା ଜଣାପଡ଼ିଛି। ଏଥିରେ ୨ ଜଣ ଜଗୁଆଳି ଗୁରୁତର ଆହତ ହୋଇଛନ୍ତି। ପୁଲିସ ଘଟଣାସ୍ଥଳରେ ପହଞ୍ଚି ଗୁରୁତର ଜଗୁଆଳିଙ୍କୁ ଉଦ୍ଧାର କରି ମେଡିକାଲକୁ ଚିକିତ୍ସା ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି। ଏନେଇ କାଜୁ ଜଙ୍ଗଲ ଲିଜଧାରୀ ଥାନାରେ ଏତଲା ଦେଇଛନ୍ତି। ସ୍ଥାନୀୟ ଅଞ୍ଚଳର କେତେ ଜଣ ଅସାମାଜିକ ଯୁବକ ସେଠାରୁ ବେଆଇନ ଭାବେ ମାଙ୍କଡ଼ ପଥର ଚାଲାଣ କରୁଛନ୍ତି। ଏହାକୁ ଲିଜ ମାଲିକ ବିରୋଧକୁ କେନ୍ଦ୍ର କରିଥିଲେ। ଏ ନେଇ ଦୁର୍ବୃତ୍ତ ମାନେ ଜଣେ ୱେବ ଚ୍ୟାନେଲ ଖବରଦାତାଙ୍କୁ ଧମକ ଦେଇଥିଲେ।
ସୂଚନା ଅନୁଯାୟୀ ସେହି ଗ୍ରାମର ଅବଦୁଲ ମଲିକ କାଜୁ ଜଙ୍ଗଲ ଲିଜ ନେଇଛନ୍ତି। ଅନ୍ୟପଟେ ସେହି ଅଞ୍ଚଳର କେତେ ଜଣ ଅସାମାଜିକ ଯୁବକ କାଜୁ ଜଙ୍ଗଲରୁ ବେଆଇନ୍ ଭାବେ ମାଙ୍କଡ଼ ପଥର ଚାଲାଣ କରୁଥିବାରୁ ଏ ନେଇ ଅବଦୁଲ ଅଭିଯୋଗ କରିଥିଲେ। ଗ୍ରାମ କମିଟି ଉପସ୍ଥିତରେ ଏହାର ସମାଧାନ ମଧ୍ୟ ହୋଇଥିଲା। ସୋମବାର ସକାଳ ସମୟରେ ଦୁର୍ବୃତ୍ତ ମାନେ କାଜୁ ଜଙ୍ଗଲରେ ପଶି ବନ୍ଧୁକ ଦେଖାଇ ଅବଦୁଲକୁ ଭୟଭିତ କରିବା ସହ ସିରିଜ ବୋମା ମାଡ କରିଥିଲେ। କାଜୁ ଜଙ୍ଗଲକୁ ନ ଛାଡିଲେ ଜୀବନରେ ମାରି ଦେବାକୁ ହତ୍ୟା ଧମକ ଦେଇଥିବା ନେଇ ଏତାଲାକାରୀ ଅଭିଯୋଗେରେ ଦର୍ଶାଇଛନ୍ତି।
