ଲକଡାଉନରେ ଉପଯୁକ୍ତ ସ୍ୱାସ୍ଥ୍ୟ ସେବା ନ ପାଇ ପ୍ରବାସୀ ଶ୍ରମିକର ମୃତ୍ୟୁ: ସୀମା ପ୍ରବେଶ ପଥଦେଇ ଶବ ଆଣିବାକୁ ଅନୁମତି ଦେଲାନି ଜିଲ୍ଲା ପ୍ରଶାସନ
ମାଲକାନଗିରି,ଏନ୍ଏନ୍ଏସ୍: ଲକଡାଉନ ଯୋଗୁଁ ବହୁ ଗରିବ, ଖଟିଖିଆ ବିଭିିନ୍ନ ସମସ୍ୟାର ସମ୍ମୁଖୀନ ହେଉଥିବା ଦେଖାଯାଇଛି। ଏଭଳି ସମୟରେ ଜଣେ ଶ୍ରମିକ କାମ କରିବାକୁ ଯାଇ ଦେହ ଖରାପ ହେବାରୁ ଉପଯୁ୍କ୍ତ ସ୍ୱାସ୍ଥ୍ୟ ସେବା ନପାଇ ତେଲେଙ୍ଗାନାରେ ମୃତ୍ୟୁବରଣ କରିଥିବା ଜଣାପଡ଼ିଛି। ସେଠାରୁ ନିଜ ଜିଲ୍ଲା ମାଲକାନଗିରିକୁ ମୃତ ଦେହ ଆଣିବା ସମୟରେ ଜିଲ୍ଲାର ପ୍ରବେଶ ପଥ ଦେଇ ଆସିବାକୁ ଅନୁମତି ଦିଆଯାଇନଥିଲା। ଫଳରେ ସେମାନଙ୍କୁ ଅଧିକ ରାସ୍ତା ବୁଲି ବୁଲି ଆସିବାକୁ ପଡ଼ିଛି।
ସଦର ବ୍ଲକ୍ ଅନ୍ତର୍ଗତ ସେରପାଲ୍ଲୀ ପଞ୍ଚାୟତର ପଦରାଗୁଡ଼ା ଗ୍ରାମର ଦଶରଥ କୁରାମୀଙ୍କ ପୁତ୍ର ବାସୁଦେବ କୁରାମୀ(୧୬)ଙ୍କ ସମେତ ସମ୍ପୃକ୍ତ ଗ୍ରାମର ୮ଜଣ ଓ କମଳାପଦର ଗ୍ରାମର ଜଣେ ଗତ ୩ ମାସ ହେଲା ତେଲେଙ୍ଗାନା ରାଜ୍ୟର ସୀତାପେଟାଠାରେ କାମ କରିବାକୁ ଯାଇଥିଲେ। ତେବେ ସେଠାରେ ବାସୁଦେବଙ୍କୁ ଜ୍ୱର ସହ ଛାତିରେ ଯନ୍ତ୍ରଣା ହେବାରୁ ତାଙ୍କୁ ନିକଟସ୍ଥ ସରକାରୀ ଡାକ୍ତରଖାନାକୁ ନେଇଥିଲେ। ସେଠାରେ ତାଙ୍କୁ ଡାକ୍ତର ଦେଖି ମେଡ଼ିସିନ ଦେଇ ବିଦା କରିଦେଇଥିଲେ। ପରେ ଅଧିକ ଯନ୍ତ୍ରଣା ଅନୁଭବ ହେବାରୁ ତାଙ୍କୁ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରିବା ପରେ ମଧ୍ୟ ସ୍ୱାସ୍ଥ୍ୟବସ୍ଥାରେ ସୁଧାର ଆସିନଥିଲା। ପରେ ଘରକୁ ଆସିବା ପାଇଁ କୌଣସି ବିକଳ୍ପ ନ ଥିବାରୁ ବାଧ୍ୟ ହୋଇ ଏକ ପୁରୁଣା ମୋଟର ସାଇକେଲ କିଣିଥିଲେ ହେଁ ତାଙ୍କୁ ଆସିବାକୁ ଅନୁମତି ମିଳିନଥିବା ତାଙ୍କ ସହକର୍ମୀ ଶ୍ରମିକ ମେଘନାଥ ଡୁରୁକା ଓ ପ୍ରଦୀପ ଦୋରା ଅଭିଯୋଗ କରିଛନ୍ତି।
