ଦେବଗଡ଼,ଏନ୍ଏନ୍ଏସ୍: ବାରକୋଟ ଥାନା ଅନ୍ତର୍ଗତ ବାହାଡ଼ାପଶି ଛକ ନିକଟରେ ବାରକୋଟ ଥାନା ପୁଲିସ ପାଟ୍ରୋଲିଂ କରୁଥିବା ସମୟରେ ତାଳଚେରରୁ ରାଉେକେଲା ଅଭିମୁଖେ ଚୋରାରେ ଚାଲାଣ ହେଉଥିବା ଏକ କୋଇଲା ବୋଝେଇ ଟ୍ରକକୁ ପୁଲିସ ଜବତ କରିଛି। ଏଥିସହ ଗାଡି ମାଲିକ ଓ ଚାଳକକୁ ମଧ୍ୟ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି।
ପୁଲିସ ସୂଚନା ଅନୁସାରେ ଶୁକ୍ରବାର ବିଳମ୍ବିତ ରାତ୍ରିରେ ବାରକୋଟ ଥାନା ପୁଲିସ ପାଟ୍ରୋଲିଂ କରୁଥିବା ସମୟରେ ବିଶ୍ୱସ୍ତ ସୂତ୍ରରୁ ସୂଚନା ପାଇ ପୁଲିସ ସେଠାରେ ଗାଡିଗୁଡିକର ଯାଞ୍ଚ ଆରମ୍ଭ କରିଥିଲା। ଯାଞ୍ଚ ସମୟରେ ଓଆର-୦୯ଜି-୭୭୮୬ ନମ୍ବର ବିଶିଷ୍ଟ ଏକ ୧୦ ଚକିଆ ଟ୍ରକରେ ଲିଙ୍ଗରାଜ ଖଣି ଅଞ୍ଚଳରୁ ବେଆଇନ ଭାବେ ୧୬ ଟନ କୋଇଲା ରାଉରକେଲାକୁ ଚାଲାଣ ହେଉଥିଲା।
ପୁଲିସ ଗାଡ଼ିକୁ ଜବତ କରିବା ସହିତ ଗାଡ଼ି ଚାଳକ ପିଲୁ ବିଶ୍ୱାଳ ଓ ମାଲିକ ରାଜେଶ ଭୂତିଆକୁ ଗିରଫ କରିଛି। ଏଥିସହ ସେମାନଙ୍କ ନାମରେ ଭିନ୍ନ ଭିନ୍ନ ମାମଲା ରୁଜୁ କରି ସେମାନଙ୍କୁ କୋର୍ଟ ଚାଲାଣ କରିଥିଲେ। ସେଠାରେ ତାଙ୍କର ଜାମିନ ନା ମଞ୍ଜୁର ହେବାରୁ ସେମାନଙ୍କୁ ହାଜତକୁ ପଠାଯାଇଥିବା ଜଣାପଡ଼ିଛି।
