ନୟାଗଡ଼,ଏନ୍ଏନ୍ଏସ୍: ନୟାଗଡ଼ ନୂଆଗାଁ ଡିମିରିଝରି ସ୍କୁଲ ନିକଟରେ ଗତକାଲି ରାତ୍ରିରେ ଏକ ଅଘଟଣ ଖଟିଯାଇଛି। ଏକ ଟୁରିଷ୍ଟ ବସ୍ ଓଲଟି ୨୪ ଜଣ ଆହତ ହୋଇଛନ୍ତି।
ସୂଚନା ଅନୁସାରେ ବସଟି ଛତିଶଗଡ଼ ରାଜ୍ୟ ନମଗଡ଼ ଅଞ୍ଚଳରୁ ୪୫ଜଣ ଯାତ୍ରୀଙ୍କୁ ନେଇ ପୁରୀ ଜଗନ୍ନାଥ ଦର୍ଶନ ପାଇଁ ଆସିଥିଲେ। ପୁରୀ ଦର୍ଶନ ସାରି ନୃସିଂହନାଥ ଦର୍ଶନ ପାଇଁ ଯାଉଥିବା ବେଳେ ଡ୍ରାଇଭରଙ୍କ ଅସାବଧାନତା ଯୋଗୁଁ ଡିମିରିଝରି ସ୍କୁଲ ନିକଟରେ ବସଟି ଓଲଟି ପଡ଼ିଥିଲା। ପରେ ସେଠାରେ ଉପସ୍ତିତ ଥିବା ସ୍ଥାନୀୟ ଲୋକମାନେ ଦମକଳ ବାହିନୀ ଓ ପୁଲିସକୁ ଖବର ଦେବା ସହ ଲୋକମାନଙ୍କୁ ସେଠାରୁ ଊଦ୍ଧାର କରି ନୟାଗଡ଼ ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସେମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି। ସେହିପରି ଘଟଣାସ୍ଥଳରୁ ଡ୍ରାଇଭର ଫେରାର ହୋଇଯାଇଥିବା ବେଳେ ନୂଆଗାଁ ପୁଲିସ ଘଟଣାର ତଦନ୍ତ କରୁଛି।
