ନୂଆଦିଲ୍ଲୀ,ଏଜେନ୍ସି : ଦିଲ୍ଲୀର ମୌଜପୁରରେ ବିକ୍ଷୋଭ ପ୍ରଦର୍ଶନକାରୀଙ୍କ ଉପରକୁ ଗୁଳି ଚଳାଇଥିବା ଅଭିଯୋଗରେ ପୁଲିସ ଶାହରୁଖଙ୍କୁ ଗିରଫ କରିଛି। ସେ ବ୍ୟବହାର କରିଥିବା ବନ୍ଧୁକକୁ ଜବତ କରିବା ପାଇଁ ପୁଲିସ ଉଦ୍ୟମ ଜାରି ରଖିଛି। ଶାହରୁଖ ବିକ୍ଷୋଭକାରୀଙ୍କ ଉପରକୁ ତିନି ରାଉଣ୍ଡ ଗୁଳି ଚଳାଇଥିବା ସ୍ୱୀକାର କରିଛି ବୋଲି ମଙ୍ଗଳବାର ଅତିରିକ୍ତ ପୁଲିସ କମିଶନର ଅଜିତ କୁମାର ସିଙ୍ଗଲା ଏ ସମ୍ପର୍କରେ କହିଛନ୍ତି। ଶାହରୁଖର କୌଣସି ଅପରାଧିକ ପୃଷ୍ଠଭୂମି ନାହିଁ। କିନ୍ତୁ ତା’ ବାପା ବେଆଇନ ନିଶା କାରବାର ଓ ଜାଲନୋଟ୍ ମାମଲାରେ ଅଭିଯୁକ୍ତ ଅଛନ୍ତି। ଶାହରୁଖ କିଛିଦିନ ଦିଲ୍ଲୀରେ ରହି ପଞ୍ଜାବ ପଳାଇଥିଲା। ପୁଲିସ ତାକୁ ଉତ୍ତର ପ୍ରଦେଶର ଶାମ୍ଲିରୁ ଗିରଫ କରିଥିଲା। ଦିଲ୍ଲୀର ଜାଫରାବାଦରେ ଶାହରୁଖର ଘର ଥିବାବେଳେ ସେ ବ୍ୟବହାର କରିଥିବା ବନ୍ଧୁକ ବିହାରର ମୁଙ୍ଗେରରୁ କିଣିଥିଲା। ପୁଲିସ ତାକୁ କୋର୍ଟରେ ହାଜର କରି ରିମାଣ୍ଡରେ ନେବାକୁ ଅଣ୍ଟା ଭିଡିଛି।
