ରାୟଗଡା,ଏନ୍ଏନ୍ଏସ୍ : ଜାଳେଣି କାଠ ସଂଗ୍ରହ ନିମନ୍ତେ ଯାଇ, ଗଛରୁ ପଡି ୨ ଯୁବକଙ୍କ ମୃତ୍ୟୁ ଘଟିଛି। ଏଭଳି ଏକ ଅଭାବନୀୟ ଘଟଣାଟି ଘଟିଛି ରାୟଗଡା ଜିଲ୍ଲା କାଶିପୁର ବ୍ଲକ ଅନ୍ତର୍ଗତ ଚିଲକୁଲି ଗ୍ରାମରେ। ଚିରକୁଲ ଗ୍ରାମ ନିକଟରେ ଥିବା ଏକ ତେନ୍ତୁଳି ଗଛରୁ ଜାଳେଣି କାଠ ସଂଗ୍ରହ କରିବା ପାଇଁ ଗ୍ରାମର ୨ ଜଣ ଯୁବକ ବରି ମାଝି (୩୫) ଏବଂ ଲକ୍ଷଣ ମାଝି (୪୦) ଯାଇଥିଲେ। ଏକ ଅଧାକଟା ତେନ୍ତୁଳି ଗଛରେ ଚଢି କାଠ କାଟୁଥିବା ସମୟରେ ହଠାତ୍ ୧ ଜଣ ଯାକ ଗଛରୁ ଖସି ତଳେ ପଡିଯାଇଥିଲା।
ତଳେ ପଡିବା ପରେ ସେମାନଙ୍କ ଉପରେ ଗଛର ଡାଳ ମଧ୍ୟ ପଡିଯାଇଥିଲା। ଗଛରୁ ଖସି ଯାଇଥିବା ଡାଳ ଗୁଡିକ ଉଭୟଙ୍କ ଦେହର ବିଭିନ୍ନ ଅଙ୍ଗରେ ପସିଯାଇଥିଲେ। ଉଭୟ ଛଟପଟ ହେଉଥିବା ସମୟରେ ଗ୍ରାମବାସୀ ମାନେ ମିଳିତ ଭାବେ ଉଭୟଙ୍କୁ ଚିକିତ୍ସା ନିମନ୍ତେ ନିକଟସ୍ଥ ସ୍ୱାସ୍ଥ୍ୟ କେନ୍ଦ୍ରକୁ ନେବା ପୂର୍ବରୁ ରାସ୍ତାରେ ହିଁ ଉଭୟଙ୍କ ମୃତ୍ୟୁ ହୋଇଯାଇଥିଲା। ଘଟଣା ସଂପର୍କରେ କାଶିପୁର ପୋଲିସ ଜାଣିବା ପରେ ଦୁର୍ଘଟଣା ସ୍ଥାନକୁ ଯାଇ ସ୍ଥିତି ଅନୁଧ୍ୟାନ କରିବା ସହ ତଦନ୍ତ ଆରମ୍ଭ କରିଛି। ୨ ଜଣଙ୍କ ମୃତ୍ୟୁ ପରେ ଚିରକୁଲ ଗ୍ରାମରେ ଶୋକାକୁଳ ବାତାବରଣ ଖେଳି ଯାଇଛି।
