ନେଉଳିପଶି ଗ୍ରାମର ୫ ଘରୁ ଚୋରି ଅଭିଯୋଗ

ପାଟଣା,ଏନ୍ଏନ୍ଏସ୍: କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନା ବୁଢ଼ୀକାପୁଡି ପଞ୍ଚାୟତ ନେଉଳିପଶି ଗ୍ରାମର ୫ ଜଣଙ୍କ ଘରୁ ବୁଧବାର ବିଳମ୍ବିତ ରାତିରେ ଚୋରି ହୋଇଥିବା ଅଭିଯୋଗ ହୋଇଛି। ଗ୍ରାମର କୀର୍ତ୍ତନ ବିହାରୀ ମହାନ୍ତ ଓ ଶଙ୍କର୍ଷଣ ମହାନ୍ତଙ୍କ ଘରର କବାଟ ଭାଙ୍ଗି ଚୋରି ହୋଇଥିବା ବେଳେ ଅନ୍ୟ ୩ଜଣଙ୍କ ଘରୁ ଚୋରି ଉଦ୍ୟମ ହୋଇଥିବା ଜଣାପଡ଼ିଛି। ସୂଚନା ଅନୁସାରେ କୀର୍ତ୍ତନ ମାହାନ୍ତଙ୍କ ଘରେ କେହି ନଥିବା ବେଳେ ଘରର କବାଟ ଭାଙ୍ଗି ଚୋରି ହୋଇଥିବା କୀର୍ତ୍ତନଙ୍କ ପତ୍ନୀ ମାତାରଣୀ କହିଛନ୍ତି।

ମାତାରଣୀ ଏସଏଚଜି ଗ୍ରୁପରେ ସଦସ୍ୟ ଥିବାବେଳେ ତାଙ୍କ ବାକ୍ସରୁ ୩୦୦୦ଟଙ୍କା ଏବଂ କିଛି ସଞ୍ଚୟ ଖାତା ଚୋରି କରିବା ସହ ଘର ନିକଟରେ ବାକ୍ସ ଓ ସଞ୍ଚୟ ଖାତା ପକାଇ ଦେଇ ପଳେଇଛନ୍ତି। ଏଥି ସହିତ ଦୁର୍ବୃତ୍ତ ଶଙ୍କର୍ଷଣଙ୍କ ଘର କବାଟ ଭାଙ୍ଗି ଆଲମିରାରୁ ଟଙ୍କା ଓ ସୁନା ଗହଣା ଲୁଟିନେଇଛନ୍ତି। ଏହା ପରେ ଦୁର୍ବୃତ୍ତମାନେ କ୍ଷମାକର ମହାନ୍ତ, ଧର୍ମପଦ ପାତ୍ର, ଓ ରମେଶ ଚନ୍ଦ୍ର ମହାନ୍ତଙ୍କ ଘରୁ ଚୋରି ଉଦ୍ୟମ କରୁଥିବା ବେଳେ ତାହା ବିଫଳ ହୋଇଛି । ତୁରୁମୁଙ୍ଗା ଥାନା ଅଞ୍ଚଳରେ ଗତ ଏକ ମାସ ଭିତରେ ୧୦ରୁ ଉଦ୍ଧ୍ୱର୍ ଘରୁ ଚୋରି ହୋଇଥିଲେ ମଧ୍ୟ ପୁଲିସ ଏ ପର୍ୟ୍ୟନ୍ତ କାହାରିକୁ ଗିରଫ କରିବାରେ ସଫଳ ହୋଇନଥିବାରୁ ଅଞ୍ଚଳବାସୀ ଅସନ୍ତୋଷ ପ୍ରକାଶ କରିଛନ୍ତି। ତେଣୁ ଖୁବଶୀଘ୍ର ଚୋରଙ୍କୁ ଧରିବା ସହିତ ରାତ୍ରିକାଳୀନ ପାଟ୍ରୋଲିଂକୁ କଡାକଡି କରିବା ପାଇଁ ସ୍ଥାନୀୟ ବୁଦ୍ଧିଜୀବୀମାନେ ଦାବି କରିଛନ୍ତି।