ଦେବଗଡ଼,ଏନ୍ଏନ୍ଏସ୍: ବାରକୋଟ ଥାନା ଅନ୍ତର୍ଗତ ସିଂହଶାଳ ଗ୍ରାମ ଦେଇ ଯାଇଥବା ଲହୁଣୀପଡ଼ା–ବାହାଡାପୋଷୀ ଏସ୍ଏଚ-୧୦ରେ ଆଜି ସକାଳେ ଅଜଣା ଗାଡି ଧକ୍କାରେ ଜଣେ ବ୍ୟାଙ୍କ ମ୍ୟାନେଜରଙ୍କ ଶୋଚନୀୟ ମୃତ୍ୟୁ ଘଟିଛି। ସୂଚନା ଅନୁଯାୟୀ ସୋମବାର ସକାଳେ ସମ୍ବନ୍ଧ ବ୍ୟାଙ୍କର ଅନୁଗୁଳ ଶାଖା ମ୍ୟାନେଜର ଭାବେ କାର୍ଯ୍ୟରତ ବଣାଇ ଥାନା ଅନ୍ତର୍ଗତ କେନ୍ଦ୍ରୀକଳା ଗ୍ରାମର ଅବିନାଶ ପାତ୍ର ନିଜ ଗ୍ରାମରୁ ବ୍ୟାଙ୍କକୁ ନିଜ କାର୍ଯ୍ୟରେ ଯୋଗଦେବାକୁ ଏକ ବାଇକ୍ ଯୋଗେ ବାହାରିଥିଲେ।
ଏହି ସମୟରେ ବାରକୋଟ ଥାନା ଅନ୍ତର୍ଗତ ସିଂହଶାଳ ଗ୍ରାମ ନିକଟରେ ତାଙ୍କୁ କୌଣସି ଅଜଣା ଗାଡି ଧକ୍କା ଦେଇ ଫେରାର ହୋଇଯାଇଥିଲା। ଫଳରେ ଘଟଣାସ୍ଥଳରେ ଅବିନାଶଙ୍କ ମୃତ୍ୟୁ ଘଟିଛି। ସେଠାରୁ ସ୍ଥାନୀୟ ଲୋକମାନେ ତାଙ୍କୁ ଉଦ୍ଧାର କରି ବାରକୋଟ ଡାକ୍ତରଖାନାରେ ଭର୍ତ୍ତି କରିଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୂଚନା ପାଇ ବାରକୋଟ ଥାନା ପୁଲିସ ମୃତ ଦେହ ଜବତ କରି ଏକ ମାମଲା ଋଜୁ କରି ଘଟଣାର ତଦନ୍ତ ଆରମ୍ଭ କରିଛି।
