ହରିଚନ୍ଦନପୁର, ଏନ୍ଏନ୍ଏସ୍ : କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅନ୍ତର୍ଗତ ହରିଚନ୍ଦନପୁର ବାଇପାସ୍ ଛକ ହୋଣ୍ଡା ସୋରୁମ ନିକଟସ୍ଥ ରାସ୍ତା କଡ଼ରୁ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି ।
ସୂଚନା ଅନୁଯାୟୀ, ଶୁକ୍ରବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ଅନୁମାନ କରାଯାଉଛି । ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ଯୁବକ ଜଣକ ବଡପଳାଶପାଳ ଗ୍ରାମ ଚଡକମରା ସାହିର ଗକୁଳ ଦେହୁରୀଙ୍କ ପୁଅ ସୁରେଶନ ଦେହୁରୀ(୩୭) ବୋଲି ଜଣାପଡିଛି । ଖବର ପାଇ ସ୍ଥାନୀୟ ଥାନା ଅଧିକାରୀ ବିଜୟ ମହାପାତ୍ର ଘଟଣାସ୍ଥଳରେ ପହଞ୍ଚି ଏନେଇ ତଦନ୍ତ ଆରମ୍ଭ କରିଛନ୍ତି ।
ଏଥିସହ ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି । ମୃତକଙ୍କ ପକେଟରୁ ୩୧୦ଟଙ୍କା ଓ ଏକ ସାଇକେଲ ଚାବି ସହ ଏକ ପଲିଥିନରେ ଜଳଖିଆ (ମାଲପୁଆ) ମିଳିଛି । ସ୍ଥାନୀୟ ଲୋକଙ୍କ କହିବା ଅନୁସାରେ ଶୁକ୍ରବାର ସାପ୍ତାହିକ ହାଟରେ ମଦ୍ୟପାନ କରି ସେ ଟଳମଳ ଅବସ୍ଥାରେ ହାଟ ଓ ବାଇପାସ୍ ଛକରେ ଘୁରି ବୁଲୁଥିବାର ଦେଖିବାକୁ ମିଳିଥିଲା ।