ଯାଜପୁର,ଏନ୍ଏନ୍ଏସ୍: ଯାଜପୁର ରୋଡ୍ ଥାନା ଅନ୍ତର୍ଗତ ବ୍ୟାସନଗର ବସଷ୍ଟାଣ୍ଡରେ ସୋମବାର ଭୋରରେ ଏକ ବଡ଼ ଧରଣର ଅଗ୍ନିକାଣ୍ଡ ଘଟିଯାଇଛି। ସୂଚନା ଅନୁସାରେ ବସ୍ଷ୍ଟାଣ୍ଡରେ ଅଟକିଥିବା ସୁଲୋଚନା ଏବଂ ନିରୂପମା ନାମକ ୨ଟି ଘରୋଇ ବସ୍ ପ୍ରତିଦିନ କଟକରୁ ଯାଜପୁରରୋଡ୍ ଚଳାଚଳ କରିଥାନ୍ତି।
ପ୍ରତିଦିନ ପରି ରବିବାର ମଧ୍ୟ ବସ ଦୁଇଟି ଷ୍ଟାଣ୍ଡରେ ନିର୍ଦ୍ଧାରିତ ସମୟରେ ପହଞ୍ଚି ଯାତ୍ରୀଙ୍କୁ ଖାଲି କରିଥିଲେ। ପରେ ଡ୍ରାଇଭର ଏବଂ ହେଲ୍ପର ଖାଇବାକୁ ଯାଇଥିଲେ। ପରେ ହଠାତ୍ ବସ୍ ଦୁଇଟି ଭିତରେ ନିଆଁ ଜଳୁଥିବା ଦେଖିବାକୁ ମିଳିଥିଲା। ସେମାନେ ତୁରନ୍ତ ବସ୍ କର୍ମଚାରୀ ଏବଂ ଅଗ୍ନିଶମ ବାହିନୀଙ୍କୁ ଖବର ଦେଇଥିଲେ।
ଅଗ୍ନିଶମ କର୍ମଚାରୀ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ନିଆଁକୁ ଆୟତ୍ତ କରିଥିଲେ। ତେବେ ଏହି ସମୟ ମଧ୍ୟରେ ବସଟି ଜଳିଯାଇଥିଲା। ଏକକାଳୀନ ୨ ବସ୍ରେ କିପରି ନଆଁ ଲାଗିଲା ତାହା ସମସ୍ତଙ୍କୁ ଆଶ୍ଚର୍ୟ୍ୟ କରିଛି। ମଶାବତୀରୁ ନିଆଁ ଲାଗିଥିବା ଅନୁମାନ କରାଯାଉଛି। ଯାଜପୁର ରୋଡ୍ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
