ପାଟଣାଗଡ଼,ଏନ୍ଏନ୍ଏସ୍: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ୱାନକ୍ରମେ ବଲାଙ୍ଗିର ଜିଲ୍ଲାକୁ ରାଜ୍ୟ ବିଜେପି ସଭାପତି ମନମୋହନ ସାମଲ ୨ ଦିନିଆ ଗସ୍ତରେ ଆସି ପ୍ରଥମ ଦିନରେ ପାଟଣାଗଡ଼ ନିର୍ବାଚନ ମଣ୍ଡଳୀରେ ବିଜେପି ପକ୍ଷରୁ ବିପୁଳ ଭାବରେ ସ୍ୱାଗତ ସମ୍ବର୍ଦ୍ଧନା କରାଯାଇଛି । ଶ୍ରୀ ସାମଲ କଣ୍ଟାବାଞ୍ଜିରୁ କାର୍ଯ୍ୟକ୍ରମ ସାରି ପାଟଣାଗଡ଼ ଆସୁଥିବାବେଳେ ପାଟଣାଗଡ଼ ସୀମାରେ ବ୍ୟାପକ ଭାବେ ସ୍ୱାଗତ କରାଯାଇଥିଲା । ପରେ ବେଲପଡ଼ା ବ୍ଲକରେ ଥିବା ବାଗ ଉଡ଼ାର ଗାଁର ସହିଦ ପ୍ରତାପ ନିଆଲଙ୍କ ଘରକୁ ଯାଇ ମାଟି ଅଣା ଯାଇଥିଲା । ସ୍ଥାନୀୟ ବର୍ଥଲା ଛକରୁ ଶ୍ରୀ ସାମଲଙ୍କୁ ବିରାଟ ପଟୁଆରରେ ଏକ ବାଇକ ଶୋଭାଯାତ୍ରାରେ ନେଇ ରାଜଖମାରରେ ବିଜେପି କର୍ମୀଙ୍କୁ ନେଇ ସାଧାରଣ ସଭା ଅନୁଷ୍ଠିତ ହୋଇଥିଲା । ଏଥିରେ ଜିଲ୍ଲା ସଭାପତି ଶିବାଜୀ ମହାନ୍ତି ସଭାପତିତ୍ୱ କରିଥିଲେ । ଜିଲ୍ଲା ସାଧାରଣ ସମ୍ପାଦକ ଶ୍ରୀବତ୍ସ ବେହେରା ସ୍ୱାଗତ ଭାଷଣ ଦେବାସହ ମଞ୍ଚ ପରିଚାଳନା କରିଥିଲେ । ଉକ୍ତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ରାଜ୍ୟ ସଭାପତି ମନମୋହନ ସାମଲ ସାଂସଦ ସଂଗୀତା ସିଂଦେଓ, ପୂର୍ବତନ ମନ୍ତ୍ରୀ କନକ ବର୍ଦ୍ଧନ ସିଂହଦେଓ ଓ ଲୋଇସିଂହା ବିଧାୟକ ଡା. ମୁକେଶ ମହାଲିଙ୍ଗ ମଞ୍ଚାସିନ ଥିଲେ । ଜିଲ୍ଲାର ସମସ୍ତ ବିଧାନସଭା ନିର୍ବାଚନ ମଣ୍ଡଳୀରୁ ହଜାର ହଜାର ସଂଖ୍ୟାରେ ବିଜେପି କର୍ମୀମାନେ ଉପସ୍ଥିତ ଥିଲେ । ରାଜ୍ୟରେ ଏଥର ବିଜେପି ସରକାର କରିବାକୁ ଶ୍ରୀ ସିଂଦେଓ ଆହ୍ୱାନ ଦେଇଥିଲେ । ୨୦୦୦ ମସିହାରୁ ଯେତେ କମିଶନ ବସିଛି ତାହା କାର୍ଯ୍ୟକାରୀ ହୋଇନାହିଁ ବୋଲି ସିଏଜି ରିପୋର୍ଟ ଦେଇଛନ୍ତି । ପାଟଣାଗଡ଼ ଜନସାଧାରଣ ଆଗାମୀ ୨୦୨୪ ନିର୍ବାଚନରେ ପ୍ରତିଶୋଧ ନେବ । ଓଡ଼ିଶାରେ ଆଗାମୀ ନିର୍ବାଚନରେ ବିଜେପି ସରକାର ନିଶ୍ଚିତ ହେବ ବୋଲି ଶ୍ରୀ ସାମଲ ଦୃଢ଼ୋକ୍ତି ପ୍ରକାଶ କରିଥିଲେ । ଶେଷରେ ପାଟଣାଗଡ଼ ନଗର ସଭାପତି ସୁଶାନ୍ତ ମହାନ୍ତି ଧନ୍ୟବାଦ ଦେଇଥିଲେ ।
