କାଲିଫର୍ଣ୍ଣଆ: ଆମେରିକାର କାଲିଫର୍ଣ୍ଣିଆରେ ଶନିବାର ଏକ ବିମାନ କ୍ରାସ୍ ହୋଇଯାଇଛି । ଫଳରେ ଏଥିରେ ଥିବା ସମସ୍ତ ୬ ଲୋକଙ୍କର ମୃତ୍ୟୁ ଘଟିଛି । ଏହି ଅଞ୍ଚଳରେ ଗତ ଏକ ସପ୍ତାହ ମଧ୍ୟରେ ଏହି ଦ୍ୱିତୟ ବିମାନ ଦୁର୍ଘଟଣା । ନ୍ୟୁୟର୍କ ପୋଷ୍ଟ ରିପୋର୍ଟ ଅନୁସାରେ ଦୁର୍ଘଟଣା ସ୍ଥାନୀୟ ସମୟାନୁସାର ସକାଳ ୪ଟା ୪୫ ମିନିଟ୍ରେ ଫ୍ରେଞ୍ଚ୍ ଭ୍ୟାଲି ବିମାନ ବନ୍ଦର ନିକଟ ମୁରିଏଟା ସହରରେ ହୋଇଛି । ଦୁର୍ଘଟଣାର କାରଣ ସମ୍ପର୍କରେ ତଦ୍ତ କରାଯାଉଛି । ତେବେ କୁହୁଡ଼ି କାରଣରୁ ରନ୍ୱେ ଦେଖାନଯିବା କାରଣରୁ ଦୁର୍ଘଟଣା ହୋଇଥିବା ସନ୍ଦେହ କରାଯାଉଛି ।
ପାଇଲଟ୍ ଲ୍ୟାଣ୍ଡିଂ ଏରିଆ ପୂର୍ବରୁ ବିମାନକୁ ଲ୍ୟାଣ୍ଡ୍ ପାଇଁ ଉଦ୍ୟମ କରିଥିଲେ । ସ୍ଥାନୀୟ ପ୍ରଶାସନ ଅନୁସାରେ ବିମାନଟି ସେସ୍ନା ସି-୫୫୦ ବିଜନେସ୍ ଜେଟ୍ ଥିଲା ଏବଂ ଏହା ଲାସ୍ ଭେଗାସ୍ର ହ୍ୟାରୀ ରିଡ୍ ଅନ୍ତର୍ଜାତୀୟ ବିମାନ ବନ୍ଦରରୁ ବାହାରିଥିଲା । ରିପୋର୍ଟ ଅନୁସାରେ କ୍ରାସ୍ ହେବାର ଏକ ଘଣ୍ଟା ୧୫ ମିନିଟ୍ ପର୍ଯ୍ୟନ୍ତ ବିମାନଟି ଜଳୁଥିଲା । ଫଳରେ ସେଠାରେ ୪୫.୫ ହଜାର ସ୍କୋୟାର୍ ଫୁଟ ଅଞ୍ଚଳରେ ନିଆଁ ଲାଗିଯାଇଥିଲା । ପ୍ରଶାସନିକ ଟିମ୍ ସେଠାରେ ପହଞ୍ଚିବା ବେଳେକୁ ବିମାନଟି ସମ୍ପୂର୍ଣ୍ଣ ଜଳିଯାଇଥିଲା । ତେବେ ବିମାନର ଯାତ୍ରୀଙ୍କ ସମ୍ପର୍କରେ କିଛି ଜଣାପଡ଼ିନାହିଁ ।
