ବାଲିଗୁଡ଼ା,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ବାଲିଗୁଡ଼ା ଉପଖଣ୍ଡ ଅନ୍ତର୍ଗତ କୋଟଗଡ଼ ବ୍ଲକ ହରିପୁର ନିକଟସ୍ଥ ବୁଢ଼ା ପାହାଡ଼ରେ କୋଟଗଡ଼ ସିଆରପିଏଫ ବାଟାଲିୟନ ଯବାନଙ୍କ କୁମ୍ବିଂ ବେଳେ ସନ୍ଦେହଜନକ ମାଓ ସାମଗ୍ରୀ ସହ ୧୧ଜଣଙ୍କୁ ଅଟକ ରଖାଯାଇଛି। ଜବତ ସାମଗ୍ରୀ ମଧ୍ୟରେ ୪ ଦେଶୀ ବନ୍ଧୁକ, ୩ ଟାଙ୍ଗିଆ, ଗୋଟିଏ କଟୁରୀ, ରଞ୍ଜକ, ହେଡ ଲାଇଟ, ଥଳି ଓ ୨ଟି ମୋବାଇଲ ଫୋନ ଜବତ ହୋଇଥିବା ଜଣାପଡ଼ିଛି ।
ସିଆରପିଏଫ ସୂଚନାନୁଯାୟୀ, କୋଟଗଡ଼ ସିଆରପିଏଫ ଯବାନମାନେ ନିଜର ଦୈନିକ ରୁଟିନ ଅନୁସାରେ ମାଦାଗୁଡ଼ା ପଞ୍ଚାୟତର ଜରିଘାଟି ଗାଁ ନିକଟରେ କୁମ୍ବିଂ କରିବା ବେଳେ ସନ୍ଦେହଜନକ ଅବସ୍ଥାରେ ବନ୍ଧୁକ ସହ କିଛି ଲୋକ ଦୌଡ଼ି ଚାଲି ଯିବାକୁ ଉଦ୍ୟମ କରୁଥିବା ଦେଖିଥିଲେ । ଫଳରେ ସିଆରପିଏଫ ପକ୍ଷରୁ ସେମାନଙ୍କୁ କାବୁ କରିବା ସହ ବହୁ ସାମଗ୍ରୀ ଜବତ କରାଯାଇଥିଲା । ଉକ୍ତ ଅଞ୍ଚଳ ମାଓବାଦୀ ଅଞ୍ଚଳ ହୋଇଥିବାରୁ ଏହି ୧୧ଜଣ ବ୍ୟକ୍ତିଙ୍କ ସମ୍ପର୍କରେ ତନାଘନା ଜାରି ରହିଛି ।
