ମୁମ୍ବାଇ,ଏଜେନ୍ସି: ମହିଳା ପ୍ରିମିୟର ଲିଗରେ ଏ ପର୍ଯ୍ୟନ୍ତ ଅପରାଜେୟ ସାବ୍ୟସ୍ତ ହୋଇଛି ମୁମ୍ବାଇ ଇଣ୍ଡିଆନ୍ସ । ୟୁପି ୱାରିୟର୍ଜ ବିପକ୍ଷ ମୁକାବିଲାରେ ଦମଦାର ବିଜୟ ହାସଲ କରି ବିଜୟଧାରା ବଜାୟ ରଖିଛି ମୁମ୍ବାଇ । ଅଧିନାୟିକା ହର୍ମନପ୍ରୀତ କୌରଙ୍କ ଦ୍ରୁତତମ ଅର୍ଦ୍ଧଶତକ ବଳରେ ୟୁପି ୱାରିୟର୍ଜକୁ ୮ ୱିକେଟରେ ପରାସ୍ତ କରି ଚତୁର୍ଥ ବିଜୟ ହାସଲ କରିଛି ମୁମ୍ବାଇ ଇଣ୍ଡିଆନ୍ସ । ୩୩ ବଲରେ ଅପରାଜିତ ୫୩ ରନ କରି ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଛନ୍ତି ହର୍ମନପ୍ରୀତ କୌର ।
ଟସ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ ୟୁପି ୱାରିୟର୍ଜ ଅଧିନାୟିକା ଆଲିସା ହିଲି । ଦଳୀୟ ସ୍କୋର ୫୮ରେ ଦଳର ୨ଟି ୱିକେଟ ପତନ ହୋଇଥିଲା । ଓପନର ଦେବୀକା ବୈଦ୍ୟ ୬ ଓ କିରଣ ନବଗିରି ୧୭ ରନ କରି ଆଉଟ ହୋଇଥିଲେ । ଆଲିସା ହିଲି ତହଲିଆ ମ୍ୟାକଗ୍ରାଥଙ୍କ ସହ ମିଶି ବ୍ୟାଟିଂ ଜାରି ରଖିଥିଲେ । ୧୭ ତମ ଓଭରରେ ସାଇକା ଇସାକ ଉଭୟଙ୍କୁ ଆଉଟ କରିଥିଲେ । ଆଲିସା ହିଲି ୪୬ ବଲରେ ୫୮ ରନ କରିଥିଲେ । ମ୍ୟାକଗ୍ରା ୫୦ ରନ କରିଥିଲେ । ଏହାପରେ ଦଳ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ସିମରେନ ଶୈଖ ଅପରାଜିତ ୯ ରନ କରି ଦଳୀୟ ସ୍କୋରକୁ ୧୫୯ରେ ପହଞ୍ଚାଇଥିଲେ । ପ୍ରଥମ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୟୁପି ୬ ୱିକେଟ ହରାଇ ୧୫୯ ରନ କରିଥିଲା । ମୁମ୍ବାଇକୁ ୧୬୦ ରନର ବିଜୟ ଲକ୍ଷ୍ୟ ଦେଇଥିଲା ୟୁପି । ମୁମ୍ବାଇ ପକ୍ଷରୁ ଇସାକ ସର୍ବାଧିକ ୩ଟି ୱିକେଟ ଅକ୍ତିଆର କରିଥିଲେ ।
୧୬୦ ରନ ବିଜୟ ଲକ୍ଷ୍ୟ ନେଇ ପାଳି ଆରମ୍ଭ କରିଥିଲା ମୁମ୍ବାଇ । ୟାସ୍ତିକା ଭାଟିଆ ଓ ହେଲି ମାଥ୍ୟୁସ ପ୍ରଥମ ୱିକେଟରେ ୫୮ ରନ ସଂଗ୍ରହ କରିଥିଲେ । ୟାସ୍ତିକା ବ୍ୟକ୍ତିଗତ ୨୭ ବଲରୁ ଦ୍ରୁତତମ ୪୨ ରନ କରି ପ୍ରଥମେ ଆଉଟ ହୋଇଥିଲେ । ପରେ ମାଥ୍ୟୁସ ୧୨ ରନ କରି ପାଭିଲିୟନ ଫେରିଥିଲେ । ଏହାପରେ ନୀତାଲି ସାଇବର ବ୍ରଣ୍ଟ ଓ ହର୍ମନପ୍ରୀତ କୌର ଆକ୍ରମଣତ୍ମକ ବ୍ୟାଟିଂ କରିଥିଲେ । ମୁମ୍ବାଇ ଇଣ୍ଡିଆନ୍ସ ୧୫ଟି ବଲ ବାକି ଥାଇ ୨ ୱିକେଟ ବିନିମୟରେ ବିଜୟ ହାସଲ କରିଥିଲା । ବ୍ରଣ୍ଟ ଓ ହର୍ମନପ୍ରୀତ ୧୦୬ ରନର ଭାଗିଦାରୀ ଗଠନ କରିଥିଲେ । ବ୍ରଣ୍ଟ ୪୫ ରନ କରିଥିଲେ । ହର୍ମନପ୍ରୀତ କୌର ୩୩ ବଲର ସାମ୍ନା କରି ଅପରାଜିତ ୫୩ ରନ କରିଥିଲେ । ଯେଉଁଥିରେ ୯ ଚୌକା ଓ ୧ ଛକା ସାମିଲ ଅଛି । ମୁମ୍ବାଇ ଇଣ୍ଡିଆନ୍ସ କ୍ରମାନ୍ବୟରେ ଚତୁର୍ଥ ବିଜୟ ସହ ଟେବୁଲ ଟପରେ ରହିଛି । ୟୁପି ୱାରିୟର୍ଜ ୪ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି । ମୁମ୍ବାଇ ଏହାର ପରବର୍ତ୍ତୀ ମ୍ୟାଚରେ ଆସନ୍ତାକାଲି (ମଙ୍ଗଳବାର) ଗୁଜରାଟକୁ ଭେଟିବ ।
