ବିଦେଶୀ ମଦ ଦୋକାନୀ ମ୍ୟାନେଜରଙ୍କ ଘରେ ଲୁଟ, ୨ ଗିରଫ

ଦେବଗଡ଼,ଏନ୍‌ଏନ୍‌ଏସ୍‌: ଦେବଗଡ଼ ପୌର ପରିଷଦ କାର୍ଯ୍ୟାଳୟ ନିକଟରେ ଭଡ଼ା ଘରେ ରହୁଥିବା ଗଣେଷ ପ୍ରସାଦ ନାମକ ଜଣେ ବିଦେଶୀ ମଦ ଦୋକାନ ମ୍ୟାନେଜରଙ୍କ ଘରେ ପଶି ଲକ୍ଷାଧିକ ଟଙ୍କା ଲୁଟ ମାମଲାର ଦେବଗଡ଼ ଥାନା ପୁଲିସ ପର୍ଦାଫାଶ କରିଛି । ଉକ୍ତ ଘଟଣାରେ ସମ୍ପୃକ୍ତ ଥିବା ଦେବଗଡ଼ ପୌରାଞ୍ଚଳ ଅନ୍ତର୍ଗତ ଆରସିଏମଏସ ସାହିର ଶିବା ମୁଖି ଓ ଦିଲ୍ଲୀପ ମୁଖିକୁ ଗିରଫ କରିଛି। ସେମାନଙ୍କ ନିକଟରୁ ନଗଦ ୧ଲକ୍ଷ ୧୨ ହଜାର ଟଙ୍କା ସହ ଲୁଟ ଟଙ୍କାରୁ କିଣିଥିବା ସ୍ପୋର୍ଟ୍ସ ସାଇକଲ, ଏଲସିଡ଼ି ଟିଭି, ହୋମ ଥିଏଟର ଓ ଆଶୀର୍ବାଦ ଫାଇନାନ୍ସରୁ ୧ଲକ୍ଷ ୨୭ ହଜାର ଟଙ୍କାର ଗୋଲଡ଼ ଲୋନରୁ ମୁକୁଳାଇଥିବା ସୁନା ଚେନ ଜବତ କରିଛି । ଲୁଟରେ ବ୍ୟବହୃତ ହୋଇଥିବା କଟର ମେସିନ, ହାତୁଡ଼ି, ଏକ ବାଇକ ଓ ପିନ୍ଧିଥିବା ଜ୍ୟାକେଟକୁ ମଧ୍ୟ ପୁଲିସ ଜବତ କରିଛି। ବିଶେଷ କଥାଟି ହେଲା, ଅଭିଯୁକ୍ତ ଲୁଟ ଟଙ୍କାରୁ ବ୍ୟାଙ୍କ କରଜ ସୁଝିି ବନ୍ଧକ ସୁନା ମୁକୁଳାଇବା ସହ ମ୍ୟୁଜିକ ସିଷ୍ଟମ, ଏଲସିଡି ଟିଭି ଓ ସ୍ପୋର୍ଟ୍ସ ସାଇକଲ କିଣିଥିବା ପୁଲିସ ସୂଚନା ଦେଇଛି ।

ସୂଚନାଯୋଗ୍ୟ ଯେ, ଗତ ୨୦ ତାରିଖ ରାତିରେ ମଦ ଦୋକାନ ମ୍ୟାନେଜର ଦୋକାନରେ ଥିବା ସୁଯୋଗ ନେଇ ଅଭିଯୁକ୍ତଦ୍ୱୟ ଯୋଜନାବଦ୍ଧ ଭାବେ ତାଙ୍କ ଘରେ ପଶି କଟର ମେସିନ ସାହାଯ୍ୟରେ କାଠ ଗ୍ରିଲ ଓ ଆଲମିରା କାଟି ସେଥିରେ ଥିବା ୨ ଲକ୍ଷ ୪୫ ହଜାର ଟଙ୍କା ଲୁଟି ନେଇ ଖସି ଯାଇଥିଲେ । ଏହି ଲୁଟ ଘଟଣାର ତଦନ୍ତ ଖୋଦ ଆଇଆଇସି ସୁରେନ୍ଦ୍ର ନାୟକ କରୁଥିବାବେଳେ ଭିଡିଓ ଫୁଟେଜ ଆଧାରରେ ଅଭିଯୁକ୍ତଙ୍କୁ ଚିହ୍ନଟ ପରେ ଆଜି ଉଭୟଙ୍କୁ ଦେବଗଡ଼ ଥାନା ପୁଲିସ ଗିରଫ କରିଛି ।