ଭୁବନେଶ୍ୱର,ଏନ୍ଏନ୍ଏସ୍: ଜୟପୁର-ଭୁବନେଶ୍ୱର ମଧ୍ୟରେ ପୂର୍ବରୁ ଗୋଟିଏ ବିମାନ ଚଳାଚଳ କରୁଥିବାବେଳେ ଏବେ ଆଉ ଏକ ବିମାନ ଉଡ଼ାଣ ଭରିବ । ଯାତ୍ରୀଙ୍କ ଚାହିଦା ଓ ଦାବିକୁ ନେଇ ଏୟାର ଇଣ୍ଡିଆ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନୀ ସାହୁ ଟ୍ୱିଟ୍ କରି ଏହି ସୂଚନା ଦେଇଛନ୍ତି । ଶ୍ରୀମତୀ ସାହୁ କହିଛନ୍ତି ଯେ, ଗତ ଅକ୍ଟୋବର ୩୧ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜୟପୁର ବିମାନବନ୍ଦରକୁ ଉଦଘାଟନ କରିଥିଲେ । ଉଦଘାଟନର ସପ୍ତାହକ ପରେ ଭୁବନେଶ୍ୱରରୁ ଜୟପୁର ଦେଇ ବିଶାଖାପାଟଣା ବିମାନ ଚଳାଚଳ କରିଥିଲା । ଏହି ବିମାନ ଏବେ ରବିବାର ବ୍ୟତୀତ ପ୍ରତିଦିନ ଚାଲିଛି । ହେଲେ ଯାତ୍ରୀ ଚାହିଦା ମେଣ୍ଟାଇ ପାରୁନଥିବାରୁ ଜୟପୁରରୁ ଭୁବନେଶ୍ୱରକୁ ୨ୟ ବିମାନ ଉଡ଼ାଣ ପାଇଁ ଦାବି ହୋଇଥିଲା । ଏନେଇ ରାଜ୍ୟ ସରକାର କେନ୍ଦ୍ରକୁ ବି ଜଣାଇଥିଲେ । ଆଉ କେନ୍ଦ୍ର ବେସାମରିକ ଚଳାଚଳ ମନ୍ତ୍ରଣାଳୟ ୨ୟ ବିମାନ ଚାଲିବାକୁ ନିର୍ଦ୍ଦେଶ ଦେଇଛନ୍ତି ।
