ପାଟଣାଗଡ଼,ଏନ୍ଏନ୍ଏସ୍: ଅଙ୍ଗନବାଡି ସଂଘର ୮ଦଫା ଦାବୀ ପୂରଣ ପାଇଁ ଭୁବନେଶ୍ୱରରେ ଚାଲିଥିବା ଆନ୍ଦୋଳନକୁ ସମର୍ଥନ ଜଣାଇ ପାଟଣାଗଡ଼ ବ୍ଲକ ସଂଘ ପକ୍ଷରୁ ସ୍ଥାନୀୟ ସିଡିପିଓ ଅଫିସ ସମ୍ମୁଖରେ ଧାରଣା ଦିଆଯାଇଥିବା ଜଣାପଡ଼ିଛି । ଏହି ପରିପ୍ରେକ୍ଷୀରେ ବ୍ଲକର ୧୩ଟି ସେକ୍ଟରର ଅଙ୍ଗନବାଡି କର୍ମୀ ବିଭିନ୍ନ ସ୍ଲୋଗାନମାନ ଦେଇ ଧାରଣାରେ ବସି ରହିଥିଲେ । ସଂଘର ବ୍ଲକ ସଭାନେତ୍ରୀ ରୂପବତୀ ଠାକୁର ଏବଂ ସମ୍ପାଦିକା ବୈଦେହୀ ଭୋଇଙ୍କ ନେତୃତ୍ୱରେ ଆୟୋଜିତ କାର୍ଯ୍ୟକ୍ରମରେ କୋଷାଧ୍ୟକ୍ଷ ବିଜୟା ନନ୍ଦ, ସଂଯୁକ୍ତା ମେହେର, ଶ୍ରୀୟାଞ୍ଜଳୀ ପଣ୍ଡା, ସୁକେଶି ଯୋଶୀ ଓ ଅନାମିକା ମିଶ୍ରଙ୍କ ସମେତ ଶତାଧିକ ସଦସ୍ୟା ଉପସ୍ଥିତ ଥିଲେ ।
