ଜଗତସିଂହପୁର,ଏନ୍ଏନ୍ଏସ୍: ପୂର୍ବତନ ମନ୍ତ୍ରୀ ତଥା ଦିବ୍ୟଙ୍ଗତ ବିଜେଡି ନେତା ବିଷ୍ଣୁ ଦାଶଙ୍କ ପୁଅ ତିର୍ତ୍ତୋଲ ବିଧାୟକ ବିଜୟ ଶଙ୍କର ଦାଶଙ୍କ ପ୍ରେମ ବିବାହକୁ ନେଇ ବିବାଦ ଘଟଣା। ଗତକାଲି ବିବାହ ପାଇଁ ସମୟ ଧାର୍ଯ୍ୟ ହୋଇଥିବା ବେଳେ ପହଞ୍ଚିନଥିଲେ ବିଧାୟକ। ଏଥିଲାଗି ଜଗତସିଂହପୁର ଥାନାରେ ଏତଲା ଦେଇଛନ୍ତି ପ୍ରେମିକା ସୋମାଲିକା ଦାଶ।
ଗତକାଲି ବିବାହ ପାଇଁ ତାରିଖ ଧାର୍ଯ୍ୟ ହୋଇଥିବା ବେଳେ ସୋମାଲିକା ଓ ତାଙ୍କ ପରିବାର ଲୋକେ ଜଗତସିଂହପୁର ସ୍ଥିତ ସବରେଜିଷ୍ଟ୍ରାର ଅଫିସରେ ପହଞ୍ଚିଥିଲେ। ମାତ୍ର ତିର୍ତ୍ତୋଲ ବିଧାୟକଙ୍କୁ ଦେଖିବାକୁ ମିଳିନଥିଲା। ତେବେ କନ୍ୟା ପକ୍ଷର ଲୋକଙ୍କୁ ଫେରିବାକୁ ପଡିଥିଲା । ଆଜି ପ୍ରେମିକା ସୋମାଲିକା ଜଗତସିଂହପୁର ଥାନାକୁ ଆସି ବିଧାୟକ ବିଜୟ ଶଙ୍କର ଦାସ, ବିଜୟଙ୍କ ଦାଦା ମାନସ ଦାସ ଓ ଦିଲ୍ଲୀପ ଦାସଙ୍କ ନାମରେ ଏତଲା ଦେଇଥିବା ଜଣାପଡ଼ିଛି।
ଏ ସମ୍ପର୍କରେ ବିଜୟ ଶଙ୍କରଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରିନାହିଁ। ସୂଚନା ଥାଉ କି ଗତ କିଛିଦିନ ତଳେ ତିର୍ତ୍ତୋଲ ବିଧାୟକ ଓ ସ୍ଥାନୀୟ ଦେଉଳି ଗ୍ରାମେଶ୍ବରର ସୋମାଲିକା ଦାସଙ୍କ ଅନ୍ତରଙ୍ଗ ମୁହୂର୍ତ୍ତର କିଛି ଫଟୋ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା। ଯୁବତୀ ଜଣଙ୍କ ନିଜ ସୋସିଆଲ ସାଇଟରେ ଏହି ଫଟୋ ଗୁଡିକୁ ଅପଲୋଡ଼ କରିଥିଲେ। ଏହାକୁ ନେଇ ଚର୍ଚ୍ଚା ଜୋର ଧରିଥିଲା।
