ଫିରିଙ୍ଗିଆ,ଏନ୍ଏନ୍ଏସ୍: ଫିରିଙ୍ଗିଆ ବ୍ଲକ ଡିଣ୍ଡିରାଗାଁ ପଞ୍ଚାୟତ ଆଦର୍ଶ ବିଦ୍ୟାଳୟ ସାମ୍ନାରେ ଅଜଣା ଗାଡ଼ି ସହ ବାଇକ ଦୁର୍ଘଟଣା ଘଟି ୨ଜଣଙ୍କ ମୃତ୍ୟୁ ହୋଇଥିବାବେଳେ ଜଣେ ମହିଳା ଗୁରୁତର ଆହତ ହୋଇଥିବା ସୂଚନା ମିଳିଛି । ମିଳିଥିବା ରିପୋର୍ଟ ମୁତାବକ, ଆଜି ଅପରାହ୍ନ ପ୍ରାୟ ୨ଟାରେ ଫିରିଙ୍ଗିଆ ବ୍ଲକ ଯାଯେସ ପଙ୍ଗା ପଞ୍ଚାୟତ ଉପର ଦାମୀଙ୍ଗିଆର ପ୍ରଶାନ୍ତ ଦିଗାଲଙ୍କ ପତ୍ନୀ ଜ୍ୟୋତ୍ସ୍ନା ଦିଗାଲ, ୧୫ ବର୍ଷୀୟ ପୁଅ ଚନ୍ଦନ ଦିଗାଲ ଓ ୪ ବର୍ଷୀୟ ପୁଅ ଆୟୁଷ ଦିଗାଲଙ୍କ ସହ ଆପାଚି ବାଇକରେ ଫୁଲବାଣୀ ମେଡିକାଲକୁ ଯାଇଥିଲେ । ହସ୍ପିଟାଲରୁ ଫେରୁଥିବା ସମୟରେ ଡିଣ୍ଡିରା ଗାଁ ଆଦର୍ଶ ବିଦ୍ୟାଳୟ ସମ୍ମୁଖରେ ବିପରୀତ ଦିଗରୁ ଦ୍ରୁତ ଗତିରେ ଆସୁଥିବା ଅଜଣା ଟ୍ରକ ସହ ତାଙ୍କର ଦୁର୍ଘଟଣା ଘଟିଥିଲା । ଫଳରେ ଘଟଣାସ୍ଥଳରେ ୨ ପୁଅଙ୍କ ମୃତ୍ୟୁ ହୋଇଥିବାବେଳେ ମା’ଙ୍କୁ ୧୦୮ ଆମ୍ବୁଲାନ୍ସ ଯୋଗେ ଫିରିଙ୍ଗିଆ ମେଡିକାଲ ଅଣାଯାଇଥିଲା । ପରେ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ଫୁଲବାଣୀ ମେଡିକାଲକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ଫିରିଙ୍ଗିଆ ପୁଲିସ ପହଞ୍ଚି ଥିବାବେଳେ ବାରମ୍ବାର ଏହି ଅଞ୍ଚଳରେ ଦୁର୍ଘଟଣା ଘଟୁଥିବାରୁ ଡିଣ୍ଡିରା ଅଞ୍ଚଳବାସୀ କ୍ଷତିପୂରଣ ଦାବୀ କରିବା ସହ ରାସ୍ତାରୋକ କରିବାରୁ ଉଭୟ ପଟେ ଯାତାୟତ ବାଧାପ୍ରାପ୍ତ ହୋଇଛି । ଅନ୍ୟପଟେ ଦିନ ୨ଟାରୁ ୫ଟା ପର୍ଯ୍ୟନ୍ତ କୌଣସି ସମାଧାନ ହୋଇ ନ ଥିବାବେଳେ ରାସ୍ତାରେ ଶବ ପଡ଼ି ରହିଥିବା ଦେଖିବାକୁ ମିଳିଛି ।
