ବ୍ୟାଙ୍କକ୍,ଏଜେନ୍ସି: ଚଳିତ ଥୋମାସ୍ ଓ ଉବେର୍ କପ୍ରେ ଭାରତୀୟ ପୁରୁଷ ଦଳ ଐତିହାସିକ ସଫଳତା ଅର୍ଜନ କରିଛି । ଦଳ ମାଲେସିଆକୁ କ୍ୱାର୍ଟର୍ ଫାଇନାଲ୍ରେ ୩-୨ରେ ହରାଇ ୪୩ ବର୍ଷ ପରେ ପ୍ରଥମ ଥର ପାଇଁ ସେମିଫାଇନାଲ୍ରେ ପ୍ରବେଶ କରିବାରେ ସକ୍ଷମ ହେବା ସହ ପ୍ରଥମ ପଦକ ନିଶ୍ଚିତ କରିଛି । ଚତୁର୍ଥ ମ୍ୟାଚ୍ ଶେଷ ସୁଦ୍ଧା ଦୁଇ ଦଳ ୨ଟି ଲେଖାଏଁ ମ୍ୟାଚ୍ ଜିତିବା ଫଳରେ ଶେଷ ମୁକାବିଲାଟି ନିର୍ଣ୍ଣାୟକ ହୋଇଥିଲା । ଉକ୍ତ ମୁକାବିଲାଟିରେ ଜବରଦସ୍ତ ପ୍ରଦର୍ଶନ କରି ଭାରତର ପ୍ରମୁଖ ସିଙ୍ଗଲ୍ସ ଖେଳାଳି ଏଚ୍ଏସ୍ ପ୍ରଣୟ ଭାରତକୁ ସେମିଫାଇନାଲ୍ରେ ପହଞ୍ଚାଇଥିଲେ । କିନ୍ତୁ ମହିଳା ଦଳ କ୍ୱାର୍ଟର୍ ଫାଇନାଲ୍ରେ ଥାଇଲାଣ୍ଡ୍ ନିକଟରେ ଆତ୍ମସମର୍ପଣ କରି ୦-୩ରେ ପରାସ୍ତ ହୋଇ ପ୍ରତିଯୋଗିତାରୁ ବିଦାୟ ନେଇଛି । ଏଥିସହ ପୂର୍ବରୁ ଦଳ ୨୦୧୪ ଓ ୨୦୧୬ରେ ବ୍ରୋଞ୍ଜ୍ ପଦକ ଜିତିଥିଲେ ହେଁ ଗତ ଦୁଇଟି ସଂସ୍କରଣରେ ସେମିଫାଇନାଲ୍ରେ ପହଞ୍ଚିବାରେ ସକ୍ଷମ ହୋଇପାରିନାହିଁ ।
ପୂର୍ବରୁ ୩ ଥର ପୁରୁଷ ଦଳ ସେମିଫାଇନାଲ୍ରେ ପହଞ୍ଚିଥିଲେ ହେଁ ଆଗକୁ ଯାଇପାରି ନ ଥିଲା । ତା’ଛଡ଼ା ସେତେବେଳେ କେବଳ ଫାଇନାଲ୍ ଖେଳୁଥିବା ଦୁଇ ଖେଳାଳିଙ୍କୁ ପଦକ ମିଳିବାର ବ୍ୟବସ୍ଥା ଥିଲା । ତେଣୁ ଏଥର ପୁରୁଷ ଦଳ ଏହି ପ୍ରତିଯୋଗିତାରେ ଅତି କମ୍ରେ ବ୍ରୋଞ୍ଜ୍ ପଦକ ନିଶ୍ଚିତ କରିଛି ।
ଭାରତୀୟ ପୁରୁଷ ଦଳ ପରାଜୟ ସହ ଅଭିଯାନ ଆରମ୍ଭ କରିଥିଲା । ଲକ୍ଷ୍ୟ ସେନ୍ ଜି ଜିଆ ଲି’ଙ୍କଠାରୁ ୨୧-୨୩, ୯-୨୧ରେ ପରାସ୍ତ ହେବା ଫଳରେ ଭାରତ ୦-୧ରେ ପଛୁଆ ରହିଥିଲା । କିନ୍ତୁ ଏହାପରେ ଭାରତ କ୍ରମାଗତ ବିଜୟ ହାସଲ କରିଥିଲା । ପ୍ରଥମେ ଡବଲ୍ସରେ ଓ ପରେ ସିଙ୍ଗଲ୍ସରେ ଦଳ ବିଜୟୀ ହୋଇ ୨-୧ରେ ଅଗ୍ରଣୀ ରହିଥିଲା ।
ଡବଲ୍ସରେ ସାତ୍ତ୍ୱିକସାଇରାଜ୍ ରାଙ୍କିରେଡ୍ଡୀ ଓ ତାଙ୍କ ଯୋଡ଼ିଦାର ଚିରାଗ୍ ଶେଟ୍ଟୀ ପ୍ରତିଦ୍ୱନ୍ଦ୍ୱୀ ଯୋଡ଼ି ଜେ ଫେଇ ଗୋହ-ନୂର୍ ଇଜୁଦ୍ଦିନ୍ଙ୍କୁ ୨୧-୧୯, ୨୧-୧୫ରେ ପରାସ୍ତ କରି ସ୍ଥିତିକୁ ବରାବର କରିଥିଲେ । ପରେ କିଦାମ୍ବୀ ଶ୍ରୀକାନ୍ତ ଚମତ୍କାର ପ୍ରଦର୍ଶନ ପୂର୍ବକ ଜେ ୟୋଙ୍ଗ୍ ଏନ୍ଜିଙ୍କ ବିପକ୍ଷରେ ୨୧-୧୧, ୨୧-୧୭ରେ ବିଜୟୀ ହୋଇଥିଲେ । କିନ୍ତୁ ଚତୁର୍ଥ ମୁକାବିଲାରେ କ୍ରିଷ୍ଣାପ୍ରସାଦ ଗାରାଗା-ବିଷ୍ଣୁବର୍ଦ୍ଧନ ଗୌଡ଼ ପ୍ରାଞ୍ଜଲା ସେମାନଙ୍କ ପ୍ରତିଦ୍ୱନ୍ଦ୍ୱୀ ଆରୋନ୍ ଚିଆ-ଏ ୟି ତିଓ ଯୋଡ଼ିଠାରୁ ୧୯-୨୧, ୧୭-୨୧ରେ ହାରିବା ଫଳରେ ପୁନର୍ବାର ସ୍ଥିତି ବରାବର ହୋଇଥିଲା । ନିର୍ଣ୍ଣାୟକ ମୁକାବିଲାରେ ଜୁନ୍ ହାଓ ଲିଓଙ୍ଗ୍ଙ୍କୁ ୨୧-୧୩, ୨୧-୮ରେ ପରାସ୍ତ କରି ପ୍ରଣୟ ପୁରୁଷ ବିଭାଗରେ ପ୍ରଥମ ଥର ପାଇଁ ପଦକ ଜିତିବା ସୁନିଶ୍ଚିତ କରିଥିଲେ । ଏଥିସହ ଭାରତ ୪୩ ବର୍ଷ ପରେ
ପ୍ରଥମେ ମହିଳା ବିଭାଗ ମୁକାବିଲା ଖେଳାଯାଇଥିବା ବେଳେ ଏଥିରେ ଭାରତକୁ ପ୍ରଥମରୁ ଝଟ୍କା ଲାଗିଥିଲା । କାରଣ ଦଳର ତାରକା ଖେଳାଳି ପିଭି ସିନ୍ଧୁ ମାଲେସିଆର ପ୍ରମୁଖ ଖେଳାଳି ରାଚାନୋକ୍ ଇନ୍ତାନନ୍ଙ୍କ ହାତରୁ ୨୧-୧୮,୧୭-୨୧,୧୨-୨୧ରେ ପରାସ୍ତ ହୋଇଥିଲେ । ଏହାପରେ ଦ୍ୱିତୀୟ ମୁକାବିଲାଟି ଡବଲ୍ସ ବର୍ଗରେ ଖେଳାଯାଇଥିଲା । ଏଥିରେ ଶ୍ରୁତି ମିଶ୍ରା-ଜିମରନ୍ ସିଙ୍ଗି ଯୋଡ଼ି ୧୬-୨୧, ୧୩-୨୧ ସିଧାସଳଖ ଗେମ୍ରେ ମାଲେସିଆ ଯୋଡ଼ି ଜେ କିଟିଥାରାକୁଲ୍-ଆର୍. ପ୍ରଜୋଙ୍ଗ୍ଜାଇଙ୍କଠାରୁ ହାରିଯାଇଥିଲା । ଫଳରେ ଭାରତ ୦-୨ରେ ପଛୁଆ ରହିଥିଲା ।
ପ୍ରତିଯୋଗିତାରେ ବଜାୟ ରହିବା ସକାଶେ ତୃତୀୟ ମୁକାବିଲାଟି ଭାରତକୁ ଜିତିବାର ନିହାତି ଆବଶ୍ୟକ ଥିଲେ ହେଁ ଏହି ସିଙ୍ଗଲ୍ସ ମ୍ୟାଚ୍ରେ ଆକର୍ଷି କଶ୍ୟପ ପ୍ରତିଦ୍ୱନ୍ଦ୍ୱୀ ପୋର୍ନପାୱି ଚୋଚୁଓଙ୍ଗ୍ଙ୍କଠାରୁ ୧୬-୨୧, ୧୧-୨୧ରେ ହାରିଯାଇଥିଲେ । ମାଲେସିଆ ୩-୦ରେ ଟାଇରେ ଆଗୁଆ ରହିବା ଫଳରେ ପରବର୍ତ୍ତୀ ଦୁଇଟି ମୁକାବିଲା ଖେଳାଯିବାର ଆବଶ୍ୟକତା ପଡ଼ି ନ ଥିଲା । ପୂର୍ବରୁ ଦଳ ଗ୍ରୁପ୍-ଡି’ରେ କାନାଡା ଓ ଆମେରିକାକୁ ହରାଇ କ୍ୱ୍ାର୍ଟର୍ରେ ସ୍ଥାନ ପକ୍କା କରିଥିଲା ।
