ନବରଙ୍ଗପୁର,ଏନ୍ଏନ୍ଏସ୍: ନବରଙ୍ଗପୁର ଜିଲ୍ଲା ମଇଦଲପୁର ଥାନା ପୁଲିସ ୯୨ଟି ଜୀବନ୍ତ କଇଁଛ ଉଦ୍ଧାର କରିବା ସହ ୨ ଜଣଙ୍କୁ ଗିରଫ କରିଛି । କୌଣସି ସୂତ୍ରରୁ ସୂଚନା ପାଇ ନବରଙ୍ଗପୁର ଏସପି ଏସ ସୁଶ୍ରୀଙ୍କ ନିର୍ଦ୍ଦେଶକ୍ରମେ ମଇଦଲପୁର ଥାନାଧିକାରୀ ନଟବର ନନ୍ଦ ଏକ ଟିମ ଗଠନ କରି ଚଢ଼ଉ କରିଥିଲେ । ଗିରଫ ଅଭିଯୁକ୍ତଦ୍ୱୟ ଚୈତନ୍ୟ ରାଉତ ଓ ରାଜେଶ ପାଇକ ବୋଲି ଏକ ସାମ୍ବାଦିକ ସମ୍ମିଳନୀରେ ପାପଡ଼ାହାଣ୍ଡି ଏସଡିପିଓ ଆଦିତ୍ୟ ସେନ ସୂଚନା ଦେଇଛନ୍ତି । ମିଳିଥିବା ରିପୋର୍ଟ ମୁତାବକ, ଡାବୁଗାଁ ଅଞ୍ଚଳରୁ ୨ କଇଁଛ ବେପାରୀ କଳାହାଣ୍ଡି ଅଭିମୁଖେ କଇଁଛ ଚାଲାଣ କରୁଥିଲେ । ମଇଦଲପୁର ପୁଲିସ କୌଣସି ସୂତ୍ରରୁ ଖବର ପାଇ କେନ୍ଦୁଗୁଡ଼ା ନିକଟରେ ଏମାନଙ୍କୁ ଧରିଥିଲେ । ଗିରଫ ଅଭିଯୁକ୍ତ ଓ ୯୨ ଟି କଇଁଛକୁ ମଇଦଲପୁର ବନ ବିଭାଗକୁ ହସ୍ତାନ୍ତର କରାଯିବ ବୋଲି ଶ୍ରୀ ସେନ ସୂଚନା ଦେଇଛନ୍ତି । ଅଧିକ ତଦନ୍ତ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ମଇଦଲପୁର ବନ ବିଭାଗ ଅଧିକାରୀ ମଧୁସୂଦନ ପାତ୍ର କହିଛନ୍ତି ।
