ରାମନାଗୁଡ଼ା,ଏନ୍ଏନ୍ଏସ୍: ରାୟଗଡ଼ା ଜିଲ୍ଲା ରାମନାଗୁଡ଼ା ଥାନା ଅଧୀନ ଚାକୁଣ୍ଡା ହାଟପଦା ନିକଟରେ ପେଟ୍ରୋଲିଂ କରୁଥିବା ରାମନାଗୁଡ଼ା ଥାନା ପୁଲିସ ଚଢ଼ଉ କରି ୬୩ କେଜି ଗଞ୍ଜେଇ ଜବତ କରିବା ସହ ୩ ଜଣଙ୍କୁ ପୁଲିସ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ଗଜପତି ଜିଲ୍ଲା ଅଡ଼ବା ଥାନା ଅଞ୍ଚଳର ରମାକାନ୍ତ ନାୟକ, ପ୍ରଦୀପ ଚନ୍ଦ୍ର ନାୟକ ଓ ମୁନା ବେହେରା । ମିଳିଥିବା ରିପୋର୍ଟ ମୁତାବକ, ମୋହନାରୁ ଏକ ବସଯୋଗେ ରାୟଗଡ଼ା ରେଲୱେ ଷ୍ଟେସନ ଦେଇ ନାଗପୁରକୁ ଚାଲାଣ ହେବାକୁ ନେଇ ରାମନାଗୁଡ଼ା ପୁଲିସ କୌଣସି ସୂତ୍ରରୁ ଖବର ପାଇ ସଦଳବଳେ ୩ ଅଭିଯୁକଙ୍କୁ ଗିରଫ କରିଥିଲା । ସେମାନଙ୍କ ନିକଟରୁ ଗଞ୍ଜେଇ ସହ ୩ଟି ମୋବାଇଲ ଓ ୪,୯୦୦ଟଙ୍କା ଜବତ କରାଯାଇଥିବା ଥାନାଧିକାରୀ ସୁନିତା ବେହେରା ସୂଚନା ଦେଇଛନ୍ତି । ଏନେଇ ରାମନାଗୁଡ଼ା ଥାନା ପୁଲିସ ଏନଡିପିଏସ ଆକ୍ଟ ଦଫା ୨୦ ବି ଅନୁଯାୟୀ ଏକ ମାମଲା ରୁଜୁ କରି ସବଇନ୍ସପେକ୍ଟର ବାବୁଲା ପ୍ରଧାନ ଏହାର ତଦନ୍ତ ଭାର ନେଇ ତଦନ୍ତ ଆରମ୍ଭ କରିଛନ୍ତି । ଗଞ୍ଜେଇ ଚୋରା କାରବାରରେ ସମ୍ପୃୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବା ଲାଗି ପୁଲିସ ତନାଘନା ଜାରି ରଖିଛି । ଗିରଫ ଅଭିଯୁକ୍ତଙ୍କୁ ପଚରାଉଚରା ପରେ ସୋମବାର କୋର୍ଟ ଚାଲାଣ କରାଯିବ ବୋଲି ଥାନାଧିକାରୀ ସୁନିତା ବେହେରା ପ୍ରକାଶ କରିଛନ୍ତି ।
