ଭୁବନେଶ୍ୱର,ଏନ୍ଏନ୍ଏସ୍: ରାଜ୍ୟରେ ଆଉ ୫୮ ନୂଆ କରୋନା ପଜିଟିଭ ଚିହ୍ନଟ ହୋଇଛନ୍ତି। ଆକ୍ରାନ୍ତଙ୍କ ମଧ୍ୟରୁ ଜଣଙ୍କୁ ଛାଡ଼ିଦେଲେ ଆଉ ସମସ୍ତେ ବାହାର ରାଜ୍ୟରୁ ଫେରିଥିବା ଜଣାପଡ଼ିଛି। ଏଥି ସହିତ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୩୫୨କୁ ବୃଦ୍ଧି ପାଇଛି।
ରାଜ୍ୟ ସୂଚନା ଓ ଲୋକ ସମ୍ପର୍କର ସୂଚନାନୁଯାୟୀ ଗଞ୍ଜାମରୁ ୨୯, ମୟୁରଭଞ୍ଜରୁ ଜଣେ, ବାଲେଶ୍ୱରରୁ ୧୫, ଅନୁଗୁଳରୁ ୧୩ ଜଣ ରହିଛନ୍ତି। ଚିହ୍ନଟ ହୋଇଥିବା ସମସ୍ତ ନୂଆ ଆକ୍ରାନ୍ତଙ୍କ ମଧ୍ୟରୁ ଗଞ୍ଜାମର ୨୯ଜଣ ଓ ମୟୂରଭଞ୍ଜର ଜଣେ ସୁରଟ ଫେରନ୍ତା ହୋଇଥିବାବେଳେ ବାଲେଶ୍ୱରର ୧୫ଜଣଙ୍କ ମଧ୍ୟରୁ ୧୦ଜଣ ପଶ୍ଚିମବଙ୍ଗ ଓ ୫ଜଣ କର୍ଣ୍ଣାଟକ ଫେରିଥିଲେ। ସେହିପରି ନୂଆକରି ଚିହ୍ନଟ ହୋଇଥିବା ଅନୁଗୁଳର ୧୩ ଜଣଙ୍କ ମଧ୍ୟରୁ ୧୧ଜଣ ସୁରତ ଫେରନ୍ତା, ଜଣେ ମହାରାଷ୍ଟ୍ର ଓ ଆଉ ଜଣେ ସ୍ଥାନୀୟ ବାସିନ୍ଦା ବୋଲି ଜଣାପଡ଼ିଛି। ଏହି ୫୮ ଜଣଙ୍କ ମଧ୍ୟରୁ ଅନୁଗୁଳର ଜଣଙ୍କୁ ଛାଡ଼ିଦେଲେ ଆଉ ୫୭ଜଣ କ୍ୱାରେଣ୍ଟାଇନ ସେଣ୍ଟରରୁ ଚିହ୍ନଟ ହୋଇଛନ୍ତି।
ସୂଚନାନୁସାରେ, ବର୍ତ୍ତମାନ ସୁଦ୍ଧା ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୩୫୨ ହୋଇଥିବାବେଳେ ୬୮ଜଣ ସୁସ୍ଥ ହୋଇଛନ୍ତି ଓ ୩ ଜଣଙ୍କର ମୃତ୍ୟୁ ଘଟିଛି। ଆଉ ୨୮୧ ଜଣ ରାଜ୍ୟର ବିଭିନ୍ନ କୋଭିଡ ହସ୍ପିଟାଲରେ ଚିକିତ୍ସିତ ହେଉଛନ୍ତି।
