ଦେବଗଡ଼,ଏନ୍ଏନ୍ଏସ୍: ଦେବଗଡ଼ ଜିଲ୍ଲାରେ ଗରିବ ଓ ଅସୁସ୍ଥ ବ୍ୟକ୍ତିଙ୍କୁ ଆର୍ଥିକ ଓ ଚିକିତ୍ସା ସହାୟତା ଯୋଗାଉଥିବା ସ୍ବେଛାସେବୀ ଅନୁଷ୍ଠାନ ଭାବେ ନିଜର ସ୍ୱତନ୍ତ ପରିଚୟ ସୃଷ୍ଟି କରିଥିବା ହ୍ୟାପି ଟୁ ହେଲ୍ପ ଫାଉଣ୍ଡେସନ ଆଜି ଠାରୁ ଆହାର କେନ୍ଦ୍ର ମୂଲ୍ୟରେ ଆହାର ଯୋଗାଇବା ଭଳି ନୂତନ କାର୍ଯ୍ୟକ୍ରମ ହାତକୁ ନେଇ ବେଶ ପ୍ରଶଂସିତ ହୋଇଛି। ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମୁଖରେ ଥିବା ସରକାରୀ ଆହାର କେନ୍ଦ୍ର ରବିବାର ଓ ଛୁଟି ଦିବସରେ ବନ୍ଦ ରହୁଥିବାରୁ ଦୁରଦୁରାନ୍ତରୁ ଆସୁଥିବା ରୋଗୀ ଓ ସେମାନଙ୍କ ସମ୍ପର୍କୀୟ ଆହାର ଯୋଜନାରୁ ବଞ୍ଚିତ ହୋଇ ଖାଦ୍ୟ ପାଇଁ ଅଧିକ ଖର୍ଚ୍ଚାନ୍ତ ହେଉଥିଲେ। ଏହାର ସମାଧାନ କରିବାକୁ ଯାଇ ସ୍ବେଛାସେବୀ ଅନୁଷ୍ଠାନ ହ୍ୟାପି ଟୁ ହେଲ୍ପ ଫାଉଣ୍ଡେସନ ସରକାରୀ ଆହାର କେନ୍ଦ୍ର ବନ୍ଦ ରହୁଥିବା ଦିନ ମାନଙ୍କରେ ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମୁଖରେ ଥିବା ଆହାର କେନ୍ଦ୍ର ନିକଟରେ ୫ ଟଙ୍କିଆ ଆହାରର ଶୁଭାରମ୍ଭ କରିଛି।
ଏହି ଅବସରରେ ଫାଉଣ୍ଡେସନର ଅଧ୍ୟକ୍ଷ ଶୁକଦେବ ଭଞ୍ଜଙ୍କ ତତ୍ୱାବଧାନରେ ଆୟୋଜିତ କାର୍ଯ୍ୟକ୍ରମରେ ଅତିଥି ଭାବେ ଅତିରିକ୍ତ ଜିଲ୍ଲାପାଳ ରେବୀକା ବିଲୁଙ୍ଗ ଓ ପୋୖରାଧକ୍ଷା ଶାନ୍ତି ମଞ୍ଜରୀ ଦେଇ ଯୋଗ ଦେଇ ଆହର ପାଇଁ ଆସିଥିବା ଜନସାଧାରଣଙ୍କ ଥାଳିରେ ଅନ୍ନ ପରଷି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଏହି ଅବସରରେ ପୋୖରାଧ୍ୟକ୍ଷ ଶାନ୍ତି ମଞ୍ଜରୀ ଦେଇ ପୌର ପରିଷଦ ପକ୍ଷରୁ ପାଇଥିବା ନିଜର ପାରିଶ୍ରମିକ ବାବଦ ୬୦ ହଜାର ଟଙ୍କା ଅର୍ଥ ରାଶିକୁ ଫାଉଣ୍ଡେସନକୁ ଦାନ କରି ଜନ କଲ୍ୟାଣ କାର୍ଯ୍ୟରେ ବିନିଯୋଗ କରିବାକୁ ପରାମର୍ଶ ଦେଇଥିଲେ।କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଫାଉଣ୍ଡେସନର ସମ୍ପାଦକ ଆଲୋକ କୁମାର ଅମାନ୍ତ, ବିଷ୍ଣୁ ପ୍ରସାଦ ନାୟକ, ରାଜକିଶୋର ଦାଶ, ଯତୀନ ନାୟକଙ୍କ ସମେତ ସମସ୍ତ ସଦସ୍ୟ ସକ୍ରିୟ ସହଯୋଗ କରିଥିଲେ।
