ଫିରିଙ୍ଗିଆ,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ଫିରିଙ୍ଗିଆ ପୁଲିସ ବଡ଼ ଗଞ୍ଜେଇ ଚାଲାଣ ରୋକିବାରେ ସଫଳ ହୋଇଛି । ଫିରିଙ୍ଗିଆ ପୁଲିସ ୫୨୯ କିଲୋ ୨୦୦ ଗ୍ରାମ ଗଞ୍ଜେଇ ଜବତ କରିଥିବାବେଳେ ମାଫିଆମାନେ ଫେରାର ହୋଇଯାଇଛନ୍ତି । ପୁଲିସର ସୂଚନାନୁସାରେ ଗଞ୍ଜେଇ ଚାଲାଣ ପାଇଁ ମାଫିଆମାନେ ପ୍ରସ୍ତୁତି ଚଲାଇଥିବା ନେଇ କୌଣସି ସୂତ୍ରରୁ ଖବର ପାଇ ଫିରିଙ୍ଗିଆ ଥାନାଧିକାରୀ ତପନ କୁମାର ନାହାକଙ୍କ ନେତୃତ୍ୱରେ ଏକ ଟିମ ଫିରିଙ୍ଗିଆ ଥାନା ଡିମିରିଗୁଡ଼ା ପଞ୍ଚାୟତ ତଳ ଟାମଟିଙ୍ଗିଆ ଗାଁ ପାଖ ରାସ୍ତା ନିକଟସ୍ଥ ଜଙ୍ଗଲ ମଧ୍ୟରେ ଥିବା ଏକ କୁଡ଼ିଆ ଘରେ ଚଢ଼ଉ କରିଥିଲେ । ପୁଲିସ ଆସିବା ନେଇ ଖବର ପାଇ ମାଫିଆମାନେ ଉକ୍ତ କୁଡ଼ିଆ ମଧ୍ୟରେ ଗଞ୍ଜେଇ ଭର୍ତ୍ତି ବସ୍ତା ଛାଡ଼ି ଫେରାର ହୋଇଯାଇଥିବାବେଳେ ପୁଲିସ ୨୧ଟି ବ୍ୟାଗରେ ଭର୍ତ୍ତି ହୋଇଥିବା ଏହି ଗଞ୍ଜେଇକୁ ଜବତ କରିଥିଲା । ଅନ୍ୟପଟେ ଏହି ଘଟଣାରେ ପୁଲିସ ଫେରାର ହୋଇଯାଇଥିବା ମାଫିଆଙ୍କୁ ଚିହ୍ନଟ କରିସାରିଥିବା ସୂଚନା ଦେଇଥିବାବେଳେ ସମସ୍ତ ମାଫିଆ ତଳଟାମଟିଙ୍ଗିଆ ଗାଁର ବୋଲି ଜଣାପଡ଼ିଛି । ଏହି ଘଟଣାରେ ଫିରିଙ୍ଗିଆ ଥାନରେ ଏକ ମାମଲା ରୁଜୁ କରି ଜବତ ଗଞ୍ଜେଇକୁ କୋର୍ଟ ଚାଲାଣ କରାଯିବା ସହ ଫେରାର ମାଫିଆଙ୍କୁ ଖୁବଶୀଘ୍ର ଧରାଯିବ ବୋଲି ଫିରିଙ୍ଗିଆ ଥାନାଧିକାରୀ ତପନ କୁମାର ନାହାକ ସୂଚନା ଦେଇଛନ୍ତି ।
