୪୩ ଓଏଏସ୍ ଅଫିସରଙ୍କ ବଦଳି
- ଭୁବନେଶ୍ୱର: ରାଜ୍ୟ ସରକାର ଆଜି ଓଏଏସ ଅଫିସରସ୍ତରରେ ଏକ ବଡ଼ଧରଣର ବଦଳି କରିଛନ୍ତି। ୪ଜଣ ବରିଷ୍ଠ ଓଏଏସ ଅଫିସରଙ୍କ ସମେତ ମୋଟ ୪୩ ଜଣ ଓଏଏସ୍ ଅଫିସରଙ୍କ ବଦଳି ହୋଇଥିବା ଜଣାପଡ଼ିଛି।
ଆଜି ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ତହସିଲଦାର ସ୍ତରରେ ୩୯ ଜଣ ଜୁନିୟର ପାହ୍ୟାର ଓଏଏସ୍ ଅଫିସରଙ୍କ ବଦଳି ହୋଇଛି। ସେମାନଙ୍କ ମଧ୍ୟରୁ ୬ ଜଣଙ୍କୁ ପରିବହନ ବିଭାଗକୁ ଡେପୁଟେସନରେ ପଠାଯାଇଥିବାବେଳେ ୯ ଜଣଙ୍କୁ ସାଧାରଣ ପ୍ରଶାସନ ବିଭାଗକୁ ପଠାଯାଇଛି। ଅନ୍ୟ ଅଫିସରମାନେ ବିଭିନ୍ନ ସ୍ଥାନରେ ତହସିଲଦାରଭାବେ ବଦଳି ହୋଇଛନ୍ତି। ସେହିପରି ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ବରିଷ୍ଠ ଓଏଏସ୍ ସୀତାରାମ ପଟେଲଙ୍କୁ ଭୁବନେଶ୍ୱର ଜେଲ୍ ନିର୍ଦ୍ଦେଶାଳୟରେ ଅତିରିକ୍ତ ଆଇଜି (ଜେଲ)ଭାବେ ବଦଳି କରାଯାଇଥିବାବେଳେ ସମ୍ବଲପୁର ମହାନଗର ନିଗମର ପୂର୍ବତନ କମିଶନର ଅନିରୁଦ୍ଧ ପ୍ରଧାନଙ୍କୁ ସମ୍ବଲପୁର ଆରଡିସି କାର୍ଯ୍ୟାଳୟକୁ ବଦଳି କରାଯାଇଛି। ସେ ଅତିରିକ୍ତଭାବେ ମା’ ସମଲେଶ୍ୱରୀ ମନ୍ଦିର ଅଞ୍ଚଳ ପରିଚାଳନା ଯୋଜନାର ଓଏସଡିଭାବେ କାର୍ଯ୍ୟ କରିବେ। ସେହିପରି ଗଞ୍ଜାମର ଡେପୁଟି ଜିଲ୍ଲାପାଳ ବିଜୟାନନ୍ଦ ସେଠୀଙ୍କୁ ପାଟଣାଗଡ଼ ଉପଜିଲ୍ଲାପାଳ ଓ ଦଶପଲ୍ଲା ତହସିଲଦାର ଅକ୍ଷୟ କୁମାର ଖେମୁଡ଼ୁଙ୍କୁ ମାଲକାନଗିରି ଉପଜିଳ୍ଲାପାଳଭାବେ ବଦଳି କରାଯାଇଛି।