କୋରାପୁଟ,ଏନ୍ଏନ୍ଏସ୍ : ଜୟପୁର ସଦର ଥାନା ସୁଖିଆଗୁଡ଼ା ଗ୍ରାମରୁ ଅବକାରୀ ବିଭାଗ ୪୦ ଲିଟର ଦେଶୀ ରନ୍ଧା ମଦ ଜବତ କରିବା ସହ ୨ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ ହରିଶ୍ଚନ୍ଦ୍ରଗୁଡ଼ାର ମଙ୍ଗଳା ପରଜା ଓ ସୁଖିଆଗୁଡ଼ାର ସୋମନାଥ ବେନିଆ। ଅବକାରୀ ଅଧୀକ୍ଷକ ମନୋଜ କୁମାର ସେଠୀଙ୍କ ନିର୍ଦ୍ଦେଶରେ ଜିଲ୍ଲାରେ ଚୋରା ମଦ କାରବାର ରୋକିବାକୁ ପ୍ରତିଦିନ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଥିବା ବେଳେ ଜୟପୁର ଅବକାରୀ ସଦର ଓଆଇସି ସଞ୍ଜୟ କୁମାର କାଣ୍ଡିଙ୍କ ନେତୃତ୍ୱରେ ଆଜି ବିଭାଗୀୟ ଟିମ୍ ଚୋରାମଦ ଚାଲାଣ ହେଉଥିବା ସୂଚନା ପାଇ ସୁଖିଆଗୁଡ଼ାରେ ଚଢ଼ଉ କରିଥିଲେ। ଗିରଫ ଅଭିଯୁକ୍ତ ଦ୍ୱୟ ଏକ ବାଇକରେ ୪୦ ଲିଟର ଦେଶୀ ରନ୍ଧା ମଦ ଗାଡ଼ି ଟ୍ୟୁବରେ ଭରି ନୂଆଗୁଡ଼ାରୁ ସୁଖିଆଗୁଡ଼ାକୁ ଯାଉଥିବାବେଳେ ଅବାକାରୀ ଟିମ୍ ବାଇକ୍ ଅଟକାଇ ଯାଞ୍ଚ କରିବା ସହ ମଦ ଜବତ କରି ସେମାନଙ୍କୁ ଗିରଫ କରିଥିଲା। ପରେ ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଥିବା ନେଇ ଜୟପୁର ଅବକାରୀ ଓଆଇସି ଶ୍ରୀ କାଣ୍ଡି ସୂଚନା ଦେଇଛନ୍ତି। ଚଢ଼ଉରେ ଏଏସଆଇ ଲକ୍ଷ୍ମଣ ରାଓ ଏବଂ ଅନ୍ୟମାନେ ସାମିଲ୍ ହୋଇଥିଲେ।
