ନବରଙ୍ଗପୁର,ଏନ୍ଏନ୍ଏସ୍ : ଭାସ୍କେଲ ନଦୀରେ ବୁଡ଼ି ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ବ୍ଲକ୍ ଅନ୍ତର୍ଗତ ରୁନିଗୁଡ଼ା ଗ୍ରାମର ୨ଭଉଣୀଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ହେମବତୀ ପୂଜାରୀ (୭) ଓ ଜୟମଣୀ ପୂଜାରୀ (୬)। ଦୁଇ ଭଉଣୀ ନଦୀରେ ଗାଧୋଇବାକୁ ଯାଇ ମୃତ୍ୟୁବରଣ କରିଛନ୍ତି। ବୁଧବାର ୨ଭଉଣୀଙ୍କ ମୃତଦେହ ନଦୀରୁ ଉଦ୍ଧାର କରାଯାଇ ଶବ ବ୍ୟବଚ୍ଛେଦ ପରେ ପରିବାର ଲୋକକୁ ହସ୍ତାନ୍ତର କରାଯାଇଛି।
ସୂଚନାନୁସାରେ ମଙ୍ଗଳବାର ଆଖୁବାଡ଼କୁ ଯିବା କହି ସମୁଦୁ ପୂଜାରୀଙ୍କ ଝିଅ ଜୟମଣୀ ଓ ଡମ୍ବରୁଧର ପୂଜାରୀଙ୍କ ଝିଅ ହେମବତୀ ନିଜଘରୁ ରୁନିଗୁଡ଼ାରୁ ବାହାରିଥିଲେ। ଆଖୁବାଡ଼ିରେ ବୁଲାବୁଲି କରି ଫେରିବା ବାଟରେ ଭାସ୍କେଲ ନଦୀ ପଡ଼ିଥିଲା। ସେଠାରେ ସେମାନେ ଗାଧୋଇବାକୁ ଯାଇଥିଲେ। ଗାଧୋଇବା ବେଳେ ସେଠାରେ ଥିବା ଏକ ଗଭୀର ଚୁଆରେ ବୁଡ଼ିଯାଇଥିଲେ। ତେବେ ସନ୍ଧ୍ୟା ହେବାରୁ ଘରକୁ ଫେରିନଥିବାରୁ ପରିବାର ଲୋକେ ବହୁ ଖୋଜାଖୋଜି କରି ନଦୀ କୂଳରୁ ସେମାନଙ୍କ ଡ୍ରେସ୍ ଦେଖିଥିଲେ। ଏନେଇ କୋଷାଗୁମୁଡ଼ା ଥାନାରେ ଜୟମଣୀ ପୂଜାରୀଙ୍କ ବାପା ସମୁଦୁ ପୂଜାରୀ ଅଭିଯୋଗ କରିଥିଲେ। ବୁଧବାର ସକାଳୁ ସେହି ନଦୀରେ ୨ ଭଉଣୀଙ୍କ ଶବ ମିଳିଥିଲା। ଏନେଇ କୋଷାଗୁମୁଡ଼ା ଥାନାରେ ପୃଥକ୍ ପୃଥକ୍ ଅପମୃତ୍ୟୁ ମାମଲା ରୁଜୁ ହୋଇ ତଦନ୍ତ ଚାଲୁଛି।
