ଫୁଲବାଣୀ,ଏନ୍ଏନ୍ଏସ୍: କିଛି ଦିନର ବ୍ୟବଧାନ ପରେ ଫୁଲବାଣୀ ସଦର ଅବକାରୀ ବିଭାଗ ପୁଣି ଗଞ୍ଜେଇ ଜବତ କରିବାରେ ସଫଳ ହୋଇଛି । ମିଳିଥିବା ରିପୋର୍ଟ ମୁତାବକ, ଫୁଲବାଣୀ ସଦର ଅବକାରୀ ବିଭାଗ ଆଜି ସକାଳେ ପେଟ୍ରୋଲିଂ କରୁଥିବାବେଳେ ଫିରିଙ୍ଗିଆ ଥାନା ଅନ୍ତର୍ଗତ ମାଝିପଡ଼ା ମୁଖ୍ୟରାସ୍ତାରେ ଗୋଟିଏ ଟ୍ରକକୁ ଅଟକାଇ ଯାଞ୍ଚ କରିଥିଲେ । ସେହି ସମୟରେ ଗାଡ଼ି ଡ୍ରାଇଭର ଫେରାର ହୋଇଯାଇ ଥିବାବେଳେ ଉକ୍ତ ଟ୍ରକରୁ ୨ କ୍ୱିଣ୍ଟାଲ ୨୦ କିଲୋ ଗଞ୍ଜେଇ ବାହାରିଥିଲା । ଟ୍ରକ ସହ ଅବକାରୀ ବିଭାଗ ଗଞ୍ଜେଇ ଜବତ କରିଛି । ଏନେଇ ଫୁଲବାଣୀ ସଦର ଅବକାରୀ ଥାନାରେ ଏକ ମାମଲା ରୁଜୁ କରାଯାଇଥିବା ନେଇ ସଦର ଅବକାରୀ ଇନ୍ସପେକ୍ଟର ଶ୍ରୀଧର ହେମ୍ବ୍ରମ ସୂଚନା ଦେଇଛନ୍ତି । ଏହି ଚଢ଼ଉରେ ଏଏସଆଇ ଭୃଗୁପତି ଦିଗାଲ, ସୁଜିତ କୁମାର ମୁଦୁଲି, ପ୍ରଦୀପ କୁମାର ମଲ୍ଲିକ, କନେଷ୍ଟବଳ ସଦାଶିବ ରଣା, ସଚିନ ଗୁରୁ ,ଏମ ସଞ୍ଜୀବ କୁମାର ଓ ଜଗନ୍ନାଥ ସାମିଲ ଥିଲେ ।
