ଜୟପୁର,ଏନ୍ଏନ୍ଏସ୍: ଜୟପୁର ସଦର ପୁଲିସ ଟଙ୍କା ଲୁଟ ମାମଲାରେ ୨ ଲୁଟେରାଙ୍କୁ ଗିରଫ କରିଛି । ଏନେଇ ଜୟପୁର ସଦର ଥାନାରେ ଏସଡିପିଓ ଅରୁପ ଅଭିଶେକ ବେହେରା ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି । ଗିରଫ ଅଭିଯୁକ୍ତଦ୍ୱୟ ହେଲେ ଗଞ୍ଜାମ ଜିଲ୍ଲାର ଆସିକା ଥାନା ଅନ୍ତର୍ଗତ ନାରାୟଣପୁର ଗ୍ରାମର ଏ. ତରୁଣ (୨୧) ଓ ପ୍ରେମ ଦାଶ(୨୦) । ପୁଲିସର କହିବାନୁଯାୟୀ, ଜୟପୁର ଓସିସି କଲୋନିର ସନ୍ତୋଷ କୁମାର ଗୌଡ଼ ଓ ତାଙ୍କ ପୁଅ ବ୍ୟାଙ୍କରୁ ୩ଲକ୍ଷ ୩୦ହଜାର ଟଙ୍କା ଉଠାଇ ଯାଉଥିଲେ । ଏଲୋ ବ୍ରିଜ ପହଞ୍ଚିବା ପରେ ବାପା ବାଇକରେ ବସିଥିବାବେଳେ ପୁଅ କୌଣସି କାମ ପାଇଁ ଓହ୍ଲାଇଥିଲେ । ସନ୍ତୋଷ ଏକା ଥିବାର ସୁଯୋଗ ନେଇ ଦୁବୁର୍ତ୍ତମାନେ ଡିକିରୁ ଟଙ୍କା ଲୁଟ କରି ଚମ୍ପଟ ମାରିବାକୁ ଚେଷ୍ଟା କରିଥିଲେ । ଏହି ସମୟରେ ସନ୍ତୋଷ ପାଟି କରିଥିଲେ । ଫଳରେ ସେଠାରେ ଥିବା ଲୋକ ଓ ବ୍ରିଜରେ ନିୟୋଜିତ ୨ ପୁଲିସ କର୍ମଚାରୀ ଲୁଟେରାଙ୍କୁ ଧରିବା ପାଇଁ ପିଛା କରିଥିଲେ । ସେଥିପାଇଁ ୨ ଲୁଟେରା ଡ୍ୟାମକୁ ଡେଇଁ ପଡ଼ିଥିଲେ । ପରେ ସ୍ଥାନୀୟ ଲୋକଙ୍କ ସହାୟତାରେ ପୁଲିସ ୨ ଅଭିଯୁକ୍ତଙ୍କୁ ଗିରଫ କରି ୩ଲକ୍ଷ ଟଙ୍କା ଓ ବାଇକ ଜବତ କରିଥିଲା । ଏହି ସମ୍ମିଳନୀରେ ସଦର ଥାନାଧିକାରୀ ଈଶ୍ୱର ତାଣ୍ଡି ଉପସ୍ଥିତ ଥିଲେ ।
