ଜୟପୁର,ଏନ୍ଏନ୍ଏସ୍: ହଷ୍ଟେଲରେ ଖାଇବାକୁ ନପାଇ ୧୪ଜଣ ଛାତ୍ର ଚାଲି ଚାଲି ଘରକୁ ପଳାଇଛନ୍ତି । କୋରାପୁଟ ଜିଲ୍ଲା ବୈପାରୀଗୁଡ଼ା ମହକୁମାସ୍ଥିତ ୪୦ ଶଯ୍ୟା ବିଶିଷ୍ଟ ଛାତ୍ରାବାସରେ ଏଭଳି ଏକ ଘଟଣା ଦେଖିବାକୁ ମିଳିଛି । ବୈପାରୀଗୁଡ଼ା ସଦର ମହକୁମାସ୍ଥିତ ୪୦ ଶଯ୍ୟା ବିଶିଷ୍ଟ ଛାତ୍ରାବାସରେ ରହୁଥିବା ୧୪ଜଣ ଛାତ୍ର ଗତକାଲି ହଷ୍ଟେଲ ଛାଡ଼ିଛନ୍ତି । ସେମାନେ ହାତରେ ନିଜ ନିଜ ବହି ବସ୍ତାନି ଧରି ହଷ୍ଟେଲ ଛାଡ଼ି ଚାଲି ଚାଲି ନିଜ ଗାଁକୁ ଯାଉଥିବା ଦୃଶ୍ୟ ଦେଖିବାକୁ ମିଳିଛି । ଛାତ୍ରାବାସରେ ସେମାନଙ୍କୁ ଠିକ ଭାବେ ଖାଇବାକୁ ଦିଆଯାଉ ନଥିବାରୁ ହଷ୍ଟେଲ ଛାଡ଼ିଥିବା ପିଲାମାନେ କହିଛନ୍ତି । ପିଲାଙ୍କ ଅଭିଭାବକମାନେ ବିଭାଗୀୟ ଅଧିକାରୀଙ୍କ ଦାୟିତ୍ୱହୀନତାକୁ ନେଇ ପ୍ରଶ୍ନ ଉଠାଇଛନ୍ତି । ଏହାର ତଦନ୍ତ ପାଇଁ ମଙ୍ଗଳ ସାମ୍ପ୍ରସାରଣ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି ବୋଲି ବିଡିଓ ପ୍ରକାଶ କରିଛନ୍ତି ।
